قىرعىزستان پرەزيدەنتى بىشكەكتە جارىلىس بولعان جىلۋ ەلەكتر ورتالىعىنا باردى
قىرعىزستان. KAZINFORM - قىرعىزستان پرەزيدەنتى سادىر جاپاروۆ تۇندە اپات بولعان بىشكەك جىلۋ ەلەكتر ورتالىعىنداعى قالپىنا كەلتىرۋ جۇمىستارىنىڭ بارىسىمەن تانىستى.
قىرعىزستان پرەزيدەنتى باسپا ءسوز قىزمەتىنىڭ حابارلاۋىنشا، ەل استاناسىنداعى جىلۋ ەلەكتر ورتالىعىنىڭ جۇمىسىن تەز ارادا قالپىنا كەلتىرۋ جونىندە شۇعىل تاپسىرما بەرىلدى. بارلىق ءتيىستى قىزمەتتەر كۇشەيتىلگەن رەجيمدە جۇمىس ىستەپ جاتىر.
ەستەرىڭىزگە سالا كەتەيىك، 2- قاڭتار كۇنى تۇنگى ساعات 3 تە بىشكەك جىلۋ ەلەكتر ورتالىعىندا اپات بولىپ، قوندىرعىلار ىستەن شىققانى حابارلانعان بولاتىن. مينيسترلەر كابينەتىنىڭ ءتوراعاسى - قىرعىز رەسپۋبليكاسى پرەزيدەنتى اكىمشىلىگىنىڭ باسشىسى اقىلبەك جاپاروۆ الماتىعا جۇمىس ساپارىن توقتاتىپ، جەدەل شتابتىڭ وتىرىسى ءوتىپ جاتقان بىشكەككە ورالدى.
قىرعىزستان رەسپۋبليكاسى ت ج م مالىمەتىنشە، اپاتتىڭ شىعۋ سەبەبىنىڭ ەكى نۇسقاسى قاراستىرىلىپ جاتىر. ونىڭ ءبىرى - ديۆەرسيادان بولۋى مۇمكىن، ەكىنشىسى - تەحنوگەندىك جاعداي.
