قىرعىزستان مەن وزبەكستان 2024 -جىلدان باستاپ اۆتوكولىكتىڭ 12 ۇلگىسىن شىعارماق
قىرعىزستان مەن وزبەكستان 2024 -جىلدان باستاپ بىرلەسىپ اۆكولىكتىڭ 12 ۇلگىسىن شىعارا باستايدى. بۇل تۋرالى «كابار» اگەنتتىگىندەگى باسپا ءسوز كونفەرەنتسياسى كەزىندە قىرعىز رەسپۋبليكاسى ەكونوميكا جانە كوممەرتسيا ءمينيسترى دانيار امانگەلديەۆ ءمالىم ەتتى. Kazinform بۇل تۋرالى كابار- عا سىلتەمە جاساپ حابارلايدى.
«قازىرگى ۋاقىتتا «التىن- تۇلپار» اۆتوجيناقتاۋ زاۋىتى پايدالانۋعا بەرۋگە دايىندالىپ جاتىر. بۇل - «ۋزاۆتوسانوات» - پەن بىرلەسكەن جوبا. كەلەر جىلى ول جوبالىق جۇمىسىن باستايدى دەپ ويلايمىن»، - دەدى ول.
مينيستر جوبانى وزبەك- قىرعىز دامۋ قورى قارجىلاندىراتىنىن اتاپ ءوتتى.
قىرعىزستاندا اۆتوكولىك جانە كوممەرتسيالىق تەحنيكا ءوندىرىسىن ۇيىمداستىرۋ كەلىسىمىنە وزبەكستان پرەزيدەنتى شاۆكات ميرزيەيەۆتىڭ قىرعىزستانعا ساپارى كەزىندە قاڭتاردا قول قويىلعانىن ەسكە سالا كەتەيىك. جوباعا سايكەس، ول ءۇش كەزەڭ بويىنشا جۇزەگە اسادى. العاشقى ءۇش جىلدا 10 مىڭ اۆتو جانە كوممەرتسيالىق تەحنيكا جاسالادى. جۇمىسقا 500 ادام تارتىلادى.
ەكىنشى كەزەڭدە اۆتوبولشەكتەر جاساۋ قوسىلىپ، 20 مىڭ اۆتو مەن كوممەرتسيالىق تەحنيكاعا دەيىن شىعارىلادى. جۇمىس ورىندارى سانى - 1000.
ارى قاراي ءوندىرىس كولەمى 30 مىڭ اۆتو جانە كوممەرتسيالىق تەحنيكاعا دەيىن ارتىپ، مەكەمەدە جۇمىس ىستەيتىن قىزمەتكەر سانى 2000 ادامعا جەتەدى.
