قىرعىزستان مەن تاجىكستان شەكارانى مەجەلەۋ ماسەلەلەرىن تالقىلادى
استانا. KAZINFORM — تاجىكستان رەسپۋبليكاسى سوعدى وبلىسىنىڭ بۋستون قالاسىندا قىرعىز- تاجىكستان مەملەكەتتىك شەكاراسىن مەجەلەۋ جانە ورناتۋ ماسەلەلەرى بويىنشا قىرعىزستان مەن تاجىكستان ۇكىمەتتىك دەلەگاتسيالارىنىڭ تەڭ ءتوراعالارى قامچىبەك تاشيەۆ پەن سايمۋمين ياتيموۆتىڭ كەزدەسۋى ءوتتى، دەپ حابارلايدى Kazinform مەنشىكتى ءتىلشىسى.
كەزدەسۋ بارىسىندا قىرعىز- تاجىك مەملەكەتتىك شەكاراسىن دەليميتاتسيالاۋ ماسەلەلەرى تالقىلانىپ، ۇكىمەتتىك دەلەگاتسيالاردىڭ جۇمىس توپتارىنا ەكى مەملەكەتتىڭ شەكارا سىزىعىنىڭ باعىتىن ودان ءارى ايقىنداۋ بويىنشا جۇمىستى جالعاستىرۋ جونىندە ناقتى تاپسىرمالار بەرىلدى.
ەسكە سالا كەتسەك، قىرعىزستان مەن تاجىكستاننىڭ 970 شاقىرىمعا جۋىق ورتاق شەكاراسى بار. سوڭعى بىرنەشە ايدا تاراپتار ءبىر- ءبىرىنىڭ اۋماعىندا كەزەگىمەن بىرلەسكەن مەملەكەتتىك شەكارانى كەلىسۋ بويىنشا بەلسەندى كەلىسسوزدەر جۇرگىزىپ جاتىر.
قىرعىز رەسپۋبليكاسىنىڭ سىرتقى ىستەر مينيسترلىگىنىڭ مالىمەتىنشە، تاراپتار ەكى مەملەكەت اراسىنداعى شەكارا سىزىعىنىڭ 90 پايىزدان استامىن كەلىسە الدى.
ۇكىمەت دەلەگاتسيالارىنىڭ تەڭ ءتوراعالارىنىڭ سوڭعى كەزدەسۋى قازان ايىنىڭ باسىندا تاجىكستان رەسپۋبليكاسىنىڭ بۋستون قالاسىندا ءوتتى.
