قىرعىزستان مەن تاجىكستان شەكارا جونىندە كەلىستى
بىشكەك. KAZINFORM - قىرعىزستان پرەزيدەنتى سادىر جاپاروۆ كابار اگەنتتىگىنە بەرگەن سۇحباتىندا قىرعىز-تاجىك شەكاراسىن رەتتەۋدىڭ شارتتارى تۋرالى باياندادى، دەپ حابارلايدى Kazinform مەنشىكتى ءتىلشىسى.

مەملەكەت باسشىسىنىڭ حابارلاۋىنشا، قىرعىز-تاجىك شەكاراسى ماسەلەسى ءىس جۇزىندە شەشىلدى. قازىرگى ۋاقىتتا قۇجاتتاردى راسىمدەۋ بويىنشا ەكىجاقتى جۇمىس جۇرگىزىلىپ جاتىر.
- جۇمىستار اياقتالعاننان كەيىن ۇكىمەتارالىق كوميسسيالار، سودان كەيىن سىرتقى ىستەر مينيسترلەرى قول قويادى. وسى پروتسەدۋرالاردىڭ بارلىعىنان كەيىن كەلىسىمدى ەكى ەلدىڭ پارلامەنتتەرى راتيفيكاتسيالايدى. كەلەسى كەزەكتە قۇجاتقا ەكى ەلدىڭ پرەزيدەنتتەرى قول قويادى، ودان كەيىن نوتالارمەن الماسۋ وتەدى. شەكارانى انىقتاۋ جۇمىستارى تاعى ءبىر-ەكى جىل جالعاسادى، سودان كەيىن عانا بۇل پروتسەسس تولىعىمەن اياقتالادى. ەڭ باستىسى، ءبىز ەكىجاقتى كەلىسىمگە كەلدىك، - دەپ مالىمدەدى پرەزيدەنت.
سادىر جاپاروۆتىڭ اتاپ وتۋىنشە، ەكى ەل اراسىنداعى شەكارالىق داۋلاردى شەشۋ كەزىندە ەكى تاراپتىڭ دا مۇددەلەرى ەسكەرىلەدى.
- ءبىزدىڭ مىڭ شاقىرىمعا جۋىق شەكارامىز بار. كوپتەگەن ۋچاسكەدە داۋلى اۋماقتار بولدى. كەي جاعدايلاردا بۇل ايماقتار تەڭ شەشىلدى. سونىمەن قاتار، ۇيلەرى شاحمات ۇلگىسىندە ورنالاسقان شەكارالىق اۋىلدار بار. بۇل ماسەلەنى دە شەشتىك. ايتپەسە، شەكارانى كۇزەتۋ ەكى جاققا دا ۇلكەن قولايسىزدىق تۋدىرىپ وتىر، - دەپ ءتۇسىندىردى ول.
پرەزيدەنتتىڭ ايتۋىنشا، ماسەلەلەر جەردىڭ ءاربىر مەترىن ەسەپكە الا وتىرىپ شەشىلگەن. تاجىك تاراپى ۇيلەرى قىرعىز جاعىنا ءوتىپ كەتكەن ازاماتتارىن قونىستاندىرادى. قىرعىزستان دا جەر تەلىمدەرىنىڭ كولەمىن ەسكەرە وتىرىپ، باسقا جەرگە ءۇي سالىپ، ازاماتتارىن ءوز اۋماعىنا كوشىرمەك.
بۇعان دەيىن قىرعىز-تاجىك مەملەكەتتىك شەكاراسى ماسەلەسى 2025-جىلدىڭ قاڭتار ايىنىڭ سوڭىنا قاراي شەشىلەتىنىن جازعان بولاتىنبىز.