قىرعىزستان مەن تاجىكستان ءبىر شاقىرىمنان استام شەكارا بولىگىن بەكىتتى
استانا. KAZINFORM - قىرعىز رەسپۋبليكاسى مەن تاجىكستان رەسپۋبليكاسىنىڭ ۇكىمەتتىك دەلەگاتسيالارى قىرعىز-تاجىكستان مەملەكەتتىك شەكاراسىن دەليميتاتسيالاۋ جانە دەماركاتسيالاۋ ماسەلەلەرى بويىنشا قوسىمشا 1,11 شاقىرىم مەملەكەتتىك شەكارا سىزىعى تۋرالى كەلىسىمگە كەلدى.
بۇل تۋرالى قىرعىزستان رەسپۋبليكاسىنىڭ مينيسترلەر كابينەتى حابار تاراتتى.
«11-18- اقپان ارالىعىندا تاجىكستان رەسپۋبليكاسىنىڭ سوعدى وبلىسىنىڭ بۋستون قالاسىندا قىرعىز رەسپۋبليكاسى مەن تاجىكستان رەسپۋبليكاسىنىڭ ۇكىمەتتىك دەلەگاتسيالارىنىڭ شەكارالاردى بەلگىلەۋ جونىندەگى قۇقىقتىق ماسەلەلەر بويىنشا توپوگرافيالىق جۇمىس توپتارىنىڭ كەزەكتى وتىرىسى ءوتتى. قىرعىز-تاجىك مەملەكەتتىك شەكاراسىن دەماركاتسيالاۋ جۇرگىزىلدى»، - دەلىنگەن حابارلامادا.
توپوگرافيالىق جۇمىس توپتارى قىرعىز-تاجىك مەملەكەتتىك شەكاراسىنىڭ 1,11 شاقىرىمدىق سىزىعى بويىنشا كەلىستى. تاراپتار قىرعىز رەسپۋبليكاسىنىڭ اۋماعىندا وتەتىن كەلەسى كەزدەسۋدە قالعان باعىتتاردى سيپاتتاۋ جۇمىسىن جالعاستىرادى. وتىرىس قورىتىندىسى بويىنشا ءتيىستى حاتتاماعا قول قويىلدى.
ەستەرىڭىزگە سالا كەتەيىك، تاجىكستان مەن قىرعىزستاننىڭ 970 شاقىرىمدىق ورتاق شەكاراسى بار. تاراپتاردىڭ كەزدەسۋلەرى ءبىر-ءبىرىنىڭ اۋماعىندا كەزەكتەسىپ وتكىزىلەدى. 2023-جىلدىڭ قازان ايىنان باستاپ قازىرگى ۋاقىتقا دەيىن ەكى ەلدىڭ ۇكىمەتتەرى قىرعىز-تاجىك مەملەكەتتىك شەكاراسىنىڭ 110 شاقىرىمنان استامىن شەگەندەدى. توپوگرافيالىق جۇمىس توپتارىنىڭ سوڭعى وتىرىسى 2024-جىلدىڭ اقپان ايىنىڭ باسىندا قىرعىز رەسپۋبليكاسىنىڭ باتكەن قالاسىندا ءوتىپ، وندا مەملەكەتتىك شەكارانىڭ 3,71 شاقىرىمى كەلىسىلدى.
