قىرعىزستان ۇلتتىق بانكى نومينالى 5000 سوم جاڭا بانكنوتىن اينالىمعا شىعاردى
استانا. KAZINFORM - قىرعىزستاندا 2024 -جىلدىڭ 10-مامىرىنان باستاپ 2023 -جىلعى ۇلگىدەگى ۇلتتىق ۆاليۋتانىڭ جاڭا بەسىنشى سەرياسىنىڭ نومينالى 5 مىڭ سوم بولاتىن بانكنوت اينالىمعا شىعارىلدى.
قىرعىزستان رەسپۋبليكاسى ۇلتتىق بانكىنىڭ مالىمەتىنشە، 2023 -جىلعى ۇلگىدەگى بەس مىڭىنشى بانكنوتتىڭ بەت جاعىندا قىرعىزدىڭ كورنەكتى اكتەرى جانە سۋرەتشىسى س. چوكموروۆتىڭ پورترەتى جانە سىرت جاعىندا «الا-توو» كينوتەاترىنىڭ عيماراتى ساقتالعان.
بانكنوتتىڭ نەگىزگى ءتۇسى مەن ولشەمى دە وزگەرىسسىز قالدى. نومينالى 5000 سومدىق بانكنوت جالعان اقشا جاساۋدان سەنىمدى قورعاۋدى قامتاماسىز ەتەتىن زاماناۋي قاۋىپسىزدىك ەلەمەنتتەرىنىڭ ءۇش دەڭگەيلى كەشەنىن قامتيدى.
ەسكە سالا كەتسەك، 10-مامىردا قىرعىزستاندا بانك قىزمەتكەرى كۇنى اتاپ وتىلەدى. بۇگىن ەل ەگەمەندىگىنىڭ اجىراماس سيمۆولىنا اينالعان ءتول ۇلتتىق ۆاليۋتاسى - قىرعىز سومىنىڭ اينالىمعا ەنگىزىلگەنىنە 31 جىل تولىپ وتىر.
اۆتور
زارينا تۋعانبايەۆا
