قىرعىزستان ەلگە تاۋىق جۇمىرتقاسىن اكەلۋگە ۋاقىتشا تىيىم سالدى
بىشكەك. KAZINFORM - قىرعىزستاندا ەلگە تاۋىق جۇمىرتقاسىن اكەلۋگە ۋاقىتشا تىيىم سالىندى. ءتيىستى قاۋلىعا 5-ماۋسىمدا قىرعىز رەسپۋبليكاسىنىڭ مينيسترلەر كابينەتى قول قويدى.

بۇل شارا ەلدىڭ ازىق-تۇلىك قاۋىپسىزدىگىن قامتاماسىز ەتۋ، ىشكى نارىقتىڭ قالىپتى جۇمىس ىستەۋى ءۇشىن ءونىمنىڭ نارىقتىق باعاسىن تۇراقتاندىرۋ، سونداي-اق كوكتەمگى-جازعى جانە جازعى-كۇزگى كەزەڭدە وتاندىق تاۋار وندىرۋشىلەردى قولداۋ ماقساتىندا ەنگىزىلدى.
قىرعىزستاندا جۇمىرتقا ءوندىرىسى %90-100 عا جەتكەنى، ال جازعى-كۇزگى كەزەڭدە ەلدەگى ءۇي شارۋاشىلىعىنداعى جۇمىرتقا ءوندىرىسى ايتارلىقتاي وسكەنى اتاپ ءوتىلدى. بۇل رەتتە ەلگە ازىق-تۇلىك قاۋىپسىزدىگى تالاپتارىنا ساي كەلمەيتىن ونىمدەردى اكەلۋ قاۋپى ارتىپ وتىر.
ۆەتەريناريالىق باقىلاۋ ستاندارتتارى ناشار ەلدەردەن تاۋىق جۇمىرتقاسىن اكەلۋ قۇس تۇماۋى مەن سالمونەللەز سياقتى ينفەكسيالار مەن اۋرۋلاردىڭ تارالۋىنا اكەلىپ، حالىقتىڭ دەنساۋلىعىنا ۇلكەن قاۋىپ توندىرەدى.
تىيىم 6 اي مەرزىمگە ەنگىزىلەدى جانە قىرعىز رەسپۋبليكاسى ارقىلى جۇمىرتقانى قايتا ەكسپورتتاۋعا، ترانزيتكە جانە ە ا ە و ءبىر سۋبەكتىسىنەن ەكىنشىسىنە ونىڭ اۋماعى شەگىندە تاسىمالداۋعا تارالمايدى.