قىرعىزستان كەدەن قىزمەتىنىڭ بۇرىنعى باسشىسى باكۋدەن بىشكەككە ەكستراديتسيالاندى

Қырғызстан өз өнімдерін Қазақстанға экспорттауға тыйым салынғанына алаңдаулы
فوتو: 24.kg

بىشكەك. KAZINFORM - قىرعىزستاننىڭ مەملەكەتتىك ۇلتتىق قاۋىپسىزدىك كوميتەتى ازەربايجان اۋماعىندا حالىقارالىق ىزدەۋدە جۇرگەن قىرعىز رەسپۋبليكاسىنىڭ مەملەكەتتىك كەدەن قىزمەتى ءتوراعاسىنىڭ بۇرىنعى ورىنباسارى رايىمبەك ماترايموۆتى ۇستاپ، بىشكەككە اكەلدى. بۇل تۋرالى ق ر م ۇ ق ك باسپا ءسوز قىزمەتى حابارلادى.

ۆەدومستۆونىڭ مالىمەتىنشە، قاماۋعا الۋ 25-ناۋرىزدا ازەربايجان رەسپۋبليكاسىنىڭ اۋماعىندا ءتيىستى بارلاۋ قىزمەتتەرىمەن بىرلەسىپ جاسالدى. سونداي-اق، ونىمەن بىرگە ونىڭ اعايىندىلارى تىلەك ماترايموۆ، رۋسلان ماترايموۆ، يسلامبەك ماترايموۆتار ۇستالىپ، ەلگە جەتكىزىلدى.

رايىمبەك ماترايموۆ قامشى كولبايەۆپەن (ق. اسانبەك) تىعىز بايلانىستا بولىپ، كەدەن قىزمەتى قىزمەتكەرلەرى مەن مەملەكەتتىك قىزمەتكەرلەر اراسىنان قىلمىستىق توپ قۇرعانى ايتىلدى.

رايىمبەك ماترايموۆقا قاتىستى قىرعىز رەسپۋبليكاسى قىلمىستىق كودەكسىنىڭ 169-بابى «زاڭسىز باس بوستاندىعىنان ايىرۋ» جانە 222-بابى «قىلمىستىق كىرىستەردى زاڭداستىرۋ (جىلىستاتۋ)» بويىنشا قىلمىستىق ءىس قوزعالدى.

«قازىرگى تاڭدا قىلمىستىق ءىس ماتەريالدارى بويىنشا ءتيىستى جەدەل-ىزدەستىرۋ شارالارى جۇرگىزىلۋدە»، - دەلىنگەن حابارلامادا.

ەستەرىڭىزگە سالا كەتەيىك، رايىمبەك ماترايموۆقا 26-قاڭتاردا ىزدەۋ جاريالانىپ، وعان قىرعىز رەسپۋبليكاسى قىلمىستىق كودەكسىنىڭ 169-بابىنىڭ 2,3-تارماعى «باس بوستاندىعىنان زاڭسىز ايىرۋ» بويىنشا ايىپ تاعىلعان بولاتىن.

اۆتور
زارينا تۋعانبايەۆا

سوڭعى جاڭالىقتار