قىرعىزستان ج و و رەكتورلارىنىڭ شەتەلدىك ستۋدەنتتەرگە جەكە جاۋاپكەرشىلىگىن ارتتىردى
استانا. KAZINFORM - قىرعىزستاندا كوشى- قون پروتسەستەرىن وڭتايلاندىرۋ شارالارى قابىلداندى. ءتيىستى جارلىققا مەملەكەت باسشىسى قول قويدى.
قۇجاتقا سايكەس، قىرعىز رەسپۋبليكاسىنىڭ مينيسترلەر كابينەتىنە قىرعىز رەسپۋبليكاسىنىڭ اۋماعىندا شەتەلدىك ازاماتتاردىڭ "ءبىرىڭعاي تەرەزە" ەرەجەسى بويىنشا كەلۋ جانە ولاردىڭ ەل اۋماعىندا ەڭبەك قىزمەتىن جۇزەگە اسىرۋ ءتارتىبىن رەتتەيتىن قۇجاتتاردى رەسىمدەۋىن وڭتايلاندىرۋ تاپسىرىلدى. سونداي-اق سىرتقى ەڭبەك كوشى-قونى سالاسىنداعى زاڭنامادا كوزدەلگەن كوميسسيالىق قاراۋ راسىمدەرىن توقتاتا تۇرىپ، شەتەلدىك جۇمىس كۇشىن تارتۋعا ارنالعان رەسپۋبليكالىق كۆوتانى ءبولۋ ءتارتىبى قايتا قارالۋعا ءتيىس.
بۇدان باسقا، ءبىلىم بەرۋ ۇيىمىنىڭ ۆيزالىق قولداۋىمەن كەلگەن تۇلعالار ءۇشىن ءبىلىم بەرۋ ۇيىمدارى باسشىلارىنىڭ دەربەس جاۋاپكەرشىلىگىن كۇشەيتۋ جانە قىرعىزستانعا شاقىرعان نەمەسە قابىلدايتىن ادامداردىڭ جانە ازاماتتىعى جوق ادامداردى تىركەۋدىڭ جانە تۇرۋ، كەلۋ، تۇرعىلىقتى جەرىن وزگەرتۋ قۇقىعىنا قۇجاتتاردى رەسىمدەۋدىڭ بەلگىلەنگەن ءتارتىبىن بۇزعانى ءۇشىن ايىپپۇل سانكسيالارىن ۇلعايتۋ كوزدەلەدى.
بۇل شارالار ەلدەگى كوشى-قون پروتسەستەرىن مەملەكەتتىك باسقارۋ جانە باقىلاۋ جۇيەسىن ودان ءارى جەتىلدىرۋ ماقساتىندا قابىلداندى جانە پيلوتتىق رەجيمدە ىسكە اسىرىلادى. پيلوتتىق جوبا ءساتتى ينتەگراتسيالانعان جاعدايدا، كوشى-قون پروتسەستەرى زاڭمەن رەتتەلەدى.
بۇعان دەيىن قىرعىزستاندا قىلمىستىق كودەكستىڭ شەتەلدىك ازاماتتارعا قاتىستى قىلمىس جاساعانى ءۇشىن جازا قاراستىراتىن باپتارىنا تۇزەتۋلەر ەنگىزۋ ۇسىنىلعان بولاتىن. زاڭ جوباسىندا شەتەلدىكتەردىڭ دەنساۋلىعى مەن مۇلكىنە زيان كەلتىرگەنى ءۇشىن جاۋاپكەرشىلىك كۇشەيتىلدى.
