قىرعىزستان 5-قىركۇيەكتەن باستاپ قازاقستاننان باراتىن ازاماتتارعا قويىلاتىن تالاپتاردى وزگەرتەدى
استانا. قازاقپارات – 5-قىركۇيەكتەن باستاپ قىرعىزستان مينيسترلەر كابينەتىنىڭ 2024 -جىلعى 31-شىلدەدەگى № 437 قاۋلىسىنا سايكەس، شەتەلدىكتەر مەن ازاماتتىعى جوق ازاماتتاردىڭ ەلگە كەلۋىنىڭ جاڭا ەرەجەلەرى كۇشىنە ەنەدى. بۇل تۋرالى ەلدىڭ تسيفرلىق دامۋ مينيسترلىگى حابارلادى.
ۆەدومستۆو ەلدە جۇمىس ىستەۋگە، وقۋعا نەمەسە بيزنەسكە قاتىسى جوق جەكە سەبەپتەر بويىنشا 60 كۇننەن ارتىق بولۋدى جوسپارلاپ وتىرعان ازاماتتار ءۇشىن جاڭا تارتىپكە نازار اۋداردى. ەندى تىركەلۋ ءۇشىن ولارعا ساپاردىڭ ماقساتىنا بايلانىستى رەسپۋبليكادا بولۋ قۇقىعىن راستايتىن قۇجات قاجەت بولادى.
جاڭا تالاپتار رەسەي، قازاقستان، تاجىكستان، ارمەنيا، بەلارۋس، گرۋزيا، ازەربايجان جانە مولدوۆا سياقتى ۆيزاسىز رەجيمى بار ەلدەردىڭ ازاماتتارىنا قاتىستى.
نەگىزگى وزگەرىستەر:
ە ا ە و ەلدەرىنىڭ (رەسەي، قازاقستان، ارمەنيا، بەلارۋس) ازاماتتارى ءاربىر 180 كۇندىك كەزەڭدە قىرعىز رەسپۋبليكاسىندا 90 كۇنگە دەيىن تىركەۋسىز بولا الادى. تاجىكستان، گرۋزيا، ازەربايجان جانە مولدوۆا ازاماتتارى ءۇشىن بۇل مەرزىم 120 كۇندىك مەرزىم ىشىندە 60 كۇندى قۇرايدى؛
وسى مەرزىمدەردەن ارتىق بولۋ ءۇشىن رەسپۋبليكادا بولۋ قۇقىعىن بەرەتىن ۋاقىتشا تۇرۋعا ىقتيارحاتتى نەمەسە باسقا قۇجاتتى، ونىڭ ىشىندە تۇرۋ ىقتيارحاتى، ازاماتتىعى جوق ادامنىڭ كۋالىگىن، "قايرىلمان" كۋالىگىن نەمەسە "مەكەن- كارتا" كۋالىگىن رەسىمدەۋ قاجەت؛
ۋاقىتشا تۇرۋعا ىقتيارحات 15 جۇمىس كۇنى ىشىندە راسىمدەلەدى، جىل سايىن بەس جىلعا دەيىن ۇزارتۋ مۇمكىندىگىمەن ءبىر جىلعا بەرىلەدى.
كورسەتىلگەن مەرزىم ۋاقىتى اياقتالعاننان كەيىن ازاماتتار قىرعىزستان اۋماعىنان كەتۋگە مىندەتتى جانە تيىسىنشە 60 نەمەسە 90 كۇن تولماي قايتا كىرە الادى.
سونىمەن قاتار، ازاماتتار مىندەتتى تىركەۋدەن بوساتىلماسا، كىرگەن ساتتەن باستاپ بەس جۇمىس كۇنى ىشىندە تىركەۋدەن وتۋگە مىندەتتى. رەسەي، قازاقستان، بەلارۋس جانە ارمەنيا ازاماتتارى ءۇشىن مۇنداي كەزەڭ 30 كۇن، ازەربايجان - 15 كۇن، تاجىكستان - 60 كۇن، گرۋزيا - 90 كۇن.
قىرعىزستاننىڭ سيفرلىق دامۋ مينيسترلىگى جانىنداعى حالىقتى تىركەۋ دەپارتامەنتىنىڭ كەز كەلگەن اۋماقتىق بولىمشەسىندە ۋاقىتشا تۇرۋعا رۇقساتتى راسىمدەۋ جانە كونسۋلتاتسيالار قولجەتىمدى.
