قىران باپتاپ، تازى وسىرگەن 13 جاستاعى قىزىلوردالىق وقۋشى

Қызылордалық оқушы
فوتو: كەيىپكەردىڭ جەكە مۇراعاتىنان

قىزىلوردا. KAZINFORM - قىزىلوردا وبلىسى شيەلى اۋدانىنىڭ 13 جاستاعى تۇرعىنى سايانباتىر ءتالىپوۆ كىشكەنتايىنان جۇيرىك باپتاپ، قۇسبەگىلىككە اۋەس بولعان. قازىرگى ۋاقىتتا جاس ورەن قازاقتىڭ ۇلىق تۇتقان ونەرىنە مىقتاپ دەن قويعانىن ايتادى.

سايانباتىردىڭ اكەسى باعدات ونى ەكى جاسىنان باستاپ اتقا مىنگىزىپ، جىلقى مالىنا جاقىن بولۋىنا باۋلىپتى. وسە كەلە ونى سان الۋان ۇلتتىق ويىن-ساۋىققا قاتىستىرۋعا نيەت تانىتقان. بۇگىندە سايانباتىر كوكپار مەن بايگەنىڭ شاباندوزى بولىپ، كوپشىلىكتىڭ جىلى ىقىلاسىنا بولەنىپ ءجۇر.

اكەسىنىڭ ايتۋىنشا، بالاسى كىشكەنتايىنان جىلقى مالىن جاقسى كورىپ، دالاداعى ەركىندىكتى سەزىنىپ وسكەن. اتقا مىنسە ارقالانىپ كەتەتىن پەرزەنتىن ول وسىلايشا جۇيرىك باپتاپ، ونىڭ قىر-سىرىنا قانىعۋعا جاقىن ەتىپ ءوسىردى. قىزىعۋشىلىق تانىتقان ۇلىنا ءقازىر بىلگەنىن ۇيرەتىپ، ۇلتتىق ءداستۇردى ۇلىقتاۋعا باۋلىپ كەلەدى.

سونداي-اق سايانباتىر قۇسبەگىلىك ونەرگە دە جاقىن ەكەنىن اڭعارتىپ وتىر. كوكتە قالىقتاعان قۇستىڭ ءتىلىن تابۋعا ۇمتىلعان جەتكىنشەك بۇل ونەرگە دەگەن ءاربىر دەرەككە كوز سالىپ، وي- تانىمىن كەڭەيتۋگە ىقىلاس تانىتادى. پەرزەنتىنىڭ وسىنداي قىزىعۋشىلىعىن بايقاعان اكەسى باعدات وعان ۇياداعى قىران قۇستىڭ بالاپانىن اكەلىپ بەرگەن. قازىر سايانباتىر اكەسىمەن بىرگە اڭشىلىققا شىعىپ، قۇس باپتاۋدىڭ قىر-سىرىن ۇيرەنىپ ءجۇر. قۇماي تازىنى قاسىنا ەرتىپ، قىران قۇستىڭ اڭعا تۇسكەنىن كورىپ، ولجاسىن ءتۇز دالادان ىزدەۋدە.

«ۇلتتىق سالت-ءداستۇردى زەرتتەي ءجۇرىپ، جىلقىمەن بايلانىستى سپورت تۇرلەرىنە نازار اۋداردىم. كەيىن اكەم ۇيادان قارشىعانىڭ بالاپانىن اكەپ بەردى. وقىعان جانە ەستىگەن مالىمەتتەردى تاجىريبە جۇزىندە ىسكە اسىرۋعا مۇمكىندىك تۋدى»، - دەيدى سايانباتىر.

قىران باپتاۋ - وتباسىلىق ءۇردىس. بۇعان دەيىن دە اكەلى-بالالى ۇيادان بالاپان اكەلىپ، قولعا ۇيرەتىپ، كەيىن ەركىندىككە جىبەرەتىن بولعان.

اۆتور
ءادىلجان ۇمبەت

سوڭعى جاڭالىقتار