قىلمىس قۇربانى بولساڭىز، قانداي جاعدايدا مەملەكەت وتەماقى تولەيدى

قازاقستاندا اۋىر قۇقىق بۇزۋشىلىقتاردان زارداپ شەككەن ازاماتتارعا باستاپقى قارجىلىق قولداۋ كورسەتۋگە باعىتتالعان «جابىرلەنۋشىلەرگە وتەماقى قورى تۋرالى» زاڭ قولدانىلادى.

بۇل تولەم - مەملەكەت تاراپىنان كورسەتىلەتىن ماتەريالدىق كومەك. ونى الۋ ءۇشىن كىنالى ادامنىڭ انىقتالۋى، جاۋاپقا تارتىلۋى نەمەسە كەلتىرىلگەن زالالدى وتەۋى مىندەتتى ەمەس.

كىمدەر وتەماقى الا الادى؟

زاڭ بويىنشا وتەماقى الۋعا قۇقىعى بار ازاماتتاردىڭ ساناتىنا:

جىنىستىق زورلىق-زومبىلىقتان زارداپ شەككەن كامەلەتكە تولماعاندار؛

ادام ساۋداسىنىڭ قۇرباندارى؛

ازاپتاۋدان زارداپ شەككەندەر؛

قىلمىس سالدارىنان دەنساۋلىعىنا اۋىر زيان كەلتىرىلگەن ادامدار؛

قىلمىس سالدارىنان ايتۆ/جيتس جۇقتىرعان ادامدار جاتادى.

سونداي-اق جابىرلەنۋشى قايتىس بولعان جاعدايدا ونىڭ زاڭدى وكىلدەرى نەمەسە جاقىن تۋىستارى وتەماقى الۋعا قۇقىلى. ناقتى ساناتتار مەن تالاپتار زاڭدا كورسەتىلگەن.

قانشا اقشا تولەنەدى؟

وتەماقى ءبىر رەت تولەنەدى. ونىڭ مولشەرى ايلىق ەسەپتىك كورسەتكىشكە (ا ە ك) بايلانىستى ەسەپتەلىپ، قىلمىس ساناتىنا قاراي 30 دان 50 ا ە ك- كە دەيىن بولادى.

ءوتىنىشتى قاشان بەرۋگە بولادى؟

جابىرلەنۋشى وتەماقى الۋ ءۇشىن ءوزىن جابىرلەنۋشى دەپ تانىعان كۇننەن باستاپ ءۇش جىل ىشىندە ءوتىنىش بەرە الادى.

قىلمىستىق قۋدالاۋ ورگانى ادامدى جابىرلەنۋشى دەپ تانىعان كەزدە وعان قوردان وتەماقى الۋ قۇقىعىن جانە ءوتىنىش بەرۋ ءتارتىبىن جازباشا تۇردە تۇسىندىرۋگە مىندەتتى.

ءوتىنىشتى قايدا بەرۋ كەرەك؟

بانك شوتى كورسەتىلگەن ءوتىنىشتى قىلمىستىق ءىستى جۇرگىزىپ جاتقان تەرگەۋشىگە نەمەسە انىقتاۋشىعا بەرۋگە بولادى.

قاجەتتى پروتسەستىك قۇجاتتار پاكەتى قالىپتاستىرىلعاننان كەيىن قازىناشىلىق تولەمدى قولما-قول اقشاسىز تارتىپپەن جۇزەگە اسىرادى.

وتەماقى العاننان كەيىن زالالدى ءوندىرىپ الۋعا بولا ما؟

ءيا. مەملەكەتتىك وتەماقىنى الۋ ازاماتتىڭ كىنالى ادامنان سوت تارتىبىمەن ماتەريالدىق جانە مورالدىق زياندى تولىق وتەۋدى تالاپ ەتۋ قۇقىعىن شەكتەمەيدى.

قوسىمشا اقپاراتتى قايدان الۋعا بولادى؟

تولىق تۇسىنىكتەمە الۋ ءۇشىن ازاماتتار قىلمىستىق ءىس جۇرگىزىلىپ جاتقان جەردەگى قۇقىق قورعاۋ ورگاندارىنا جۇگىنە الادى.

وسىعان دەيىن سەمەيدە 19 جاستاعى قىزدىڭ ولىمىنە قاتىستى تەرگەۋ جۇرگىزىلىپ جاتقانىن جازعانبىز. پوليتسيانىڭ مالىمەتىنشە، كۇدىكتى ءىزىن سۋىتپاي ۇستالدى. ول 24 جاستاعى جەرگىلىكتى تۇرعىن بولىپ شىقتى.