قىمبات كوسمەتيكادان دا ماڭىزدى: سىمباتتى كورىنۋگە كومەكتەسەتىن سۇلۋلىق قۇپيالارى

ەندەشە بۇگىن ءبىز ءوزىڭىزدى سەرگەك سەزىنۋگە كومەكتەسەتىن قاراپايىم ادەتتەر جايىن ءسوز ەتكىمىز كەلەدى. ولاردىڭ ەشقايسىسىنا كوپ اقشا قاجەت ەمەس. تەك ۋاقىت ءبولىپ، تۇراقتى ورىنداۋعا جانە وزىڭىزگە كوڭىل بولۋگە دايىن بولساڭىز بولعانى.

ۇيقىنىڭ ۇزاقتىعىنا عانا ەمەس، رەجيمىنە دە ءمان بەرىڭىز

كۇنىنە سەگىز ساعات ۇيىقتاۋ كەرەگىن ءبارىمىز بىلەمىز. الايدا ۇيقىنىڭ ۇزاقتىعىمەن قاتار، ونىڭ ۋاقىتى دا ماڭىزدى.

اپتا بويى تاڭعى جەتىدە تۇرىپ، دەمالىس كۇندەرى تۇسكە دەيىن ۇيىقتاۋ اعزاعا وڭاي ەمەس. مۇندايدا ادام سەرگىپ ويانۋدىڭ ورنىنا، كەرىسىنشە، ءوزىن شارشاڭقى سەزىنۋى مۇمكىن.

سوندىقتان كۇن سايىن، دەمالىس پەن مەرەكە كۇندەرى دە، ءبىر ۋاقىتتا جاتىپ، ءبىر ۋاقىتتا تۇرۋعا تىرىسىڭىز. بۇل بيولوگيالىق ىرعاقتى رەتتەۋگە، گورموندىق جۇيەنىڭ قالىپتى جۇمىس ىستەۋىنە جانە كوڭىل كۇيدىڭ تۇراقتالۋىنا كومەكتەسەدى. ۇيقى رەجيمىن ساقتاۋ دەنساۋلىق ءۇشىن دە ماڭىزدى.

ۇيدەگى اۋانىڭ ىلعالدىلىعىن قاداعالاڭىز

ەڭ قىمبات كرەم ساتىپ الىپ، گيالۋرون قىشقىلىن سالدىرىپ، بەتكە بىرنەشە سارىسۋ جاققاننىڭ وزىندە، ءۇيدىڭ اۋاسى تىم قۇرعاق بولسا، تەرىگە كۇتىم جاساۋ قيىنعا سوعادى.

اسىرەسە جىلىتۋ ماۋسىمىندا نەمەسە كونديتسيونەر ۇنەمى قوسىلىپ تۇراتىن بولمەدە كوز قۇرعاپ، مۇرىننىڭ شىرىشتى قاباتى تىتىركەنۋى، تەرى تارتىلىپ، تاڭەرتەڭ بەت ءىسىنۋى مۇمكىن. مۇنداي جاعدايدا ماسەلەنى تەك كوسمەتيكادان ىزدەمەي، ءۇي ىشىندەگى اۋا ىلعالدىلىعىنا دا نازار اۋدارعان ءجون.

بولمەدەگى اۋانىڭ ىلعالدىلىعىن قالىپتى دەڭگەيدە ۇستاۋعا تىرىسىڭىز. كەيدە تەرىنىڭ جاعدايىن جاقسارتۋ ءۇشىن جاڭا كوسمەتيكالىق قۇرال ەمەس، ءدال وسى قاراپايىم وزگەرىس قاجەت بولۋى مۇمكىن.

كۇنى بويى جەتكىلىكتى مولشەردە سۋ ءىشىڭىز

بۇل ادەت الدىڭعى كەڭەسپەن دە بايلانىستى. اعزاعا سۇيىقتىق قاجەت، ءبىراق بارىنە بىردەي جارايتىن ناقتى سۋ مولشەرى جوق.

ادامداردىڭ بويى، سالماعى، ءومىر سۇرەتىن ورتاسى مەن كۇندەلىكتى بەلسەندىلىگى ءارتۇرلى. ءبىرى سپورتپەن اينالىسادى، ءبىرى كۇنى بويى قوزعالىستا جۇرەدى، ەندى ءبىرى كومپيۋتەر الدىندا وتىرادى. جۇكتىلىك پەن بالا ەمىزۋ كەزەڭىندە دە اعزانىڭ سۇيىقتىققا قاجەتتىلىگى وزگەرەدى.

سوندىقتان سۋدى تەك شولدەگەن كەزدە ەمەس، كۇنى بويى بىرتىندەپ ءىشىپ وتىرۋ ماڭىزدى. ونىڭ ۇستىنە شاي مەن كوفەنى سۋدىڭ تولىق بالاماسى دەپ قاراستىرۋعا بولمايدى. كۇندەلىكتى تازا سۋ ىشۋگە دە كوڭىل ءبولىڭىز.

جاتتىعۋدى كۇندەلىكتى ادەتكە اينالدىرىڭىز

تاڭعى بەس- التىدا - ۇيدەگىلەردىڭ ءبارى ۇيىقتاپ جاتقاندا جاتتىعۋ جاساۋ وڭاي ەمەس. دەگەنمەن 15 مينۋتتىق قارقىندى جاتتىعۋدىڭ ءوزى دەنەنى سەرگىتىپ، بەتتەگى دومبىعۋدى ازايتۋعا، وڭگە قان جۇگىرتۋگە جانە كوڭىل كۇيدى كوتەرۋگە كومەكتەسەدى.

ال تۇراقتى قوزعالىستىڭ ۇزاق مەرزىمدى پايداسى ودان دا كوپ: قان اينالىمى جاقسارادى، بۇلشىقەتتەر نىعايادى، زات الماسۋ مەن دەنە سىمباتىنا وڭ اسەر ەتەدى. ەڭ باستىسى، وزىڭىزگە قولايلى جاتتىعۋ ءتۇرىن تاڭداپ، ونى ادەتكە اينالدىرۋعا تىرىسىڭىز.

وزىڭىزگە قۋانىش سىيلايتىن ىسپەن اينالىسىڭىز

كەيدە ادامعا ەرەكشە كۇتىم دە، قىمبات دەمالىس تا قاجەت ەمەس. كوڭىلىن كوتەرىپ، جانىن تىنىشتاندىراتىن قاراپايىم نارسەنىڭ ءوزى جەتكىلىكتى.

مىسالى، ساياباقتا سەرۋەندەڭىز. ءبىراق ونى دۇكەنگە بارار جولداعى شارۋانىڭ بىرىنە اينالدىرماڭىز. قولىڭىزدا ساتىپ الاتىن زاتتاردىڭ ءتىزىمى بولماسىن، جولاي تاعى بەس جۇمىستى تىندىرۋعا اسىقپاڭىز. ساعاتقا قايتا-قايتا قاراماي، اينالاڭىزعا نازار اۋدارىپ، سەرۋەننىڭ وزىنەن ءلاززات الىڭىز.

كەيدە وسىنداي قاراپايىم ساتتەردىڭ ءوزى ادامعا ەرەكشە قۋات بەرەدى. مۇنداي كۇندەردەن كەيىن ايناعا قاراعاندا دا ءجۇزىڭىزدىڭ جادىراپ تۇرعانىن بايقايسىز. ارينە، اجىمدەر جوعالىپ كەتپەيدى. ءبىراق كوزگە قۋانىش ۇيالاپ، جۇزگە جان بىتكەندەي بولادى.

جاڭالىقتاردى تالعاپ وقىڭىز

كوڭىل كۇيدى ءتۇسىرىپ، مازاسىزدىق تۋدىراتىن اقپاراتتى مۇمكىندىگىنشە از وقۋعا تىرىسقان ءجون. الەمدەگى وقيعالاردان مۇلدە بەيحابار بولىڭىز دەمەيمىز، تەك كۇنى بويى جاعىمسىز جاڭالىقتار وقي بەرگەننەن اقىلدى بولىپ كەتپەيسىز. قايتا ول جۇيكەنى جۇقارتىپ، كۇش-قۋاتتى سارقيدى. سوندىقتان اقپارات تۇتىنۋعا دا شەك قويعان ءجون. قانداي جاڭالىقتى وقيتىنىڭىزدى، الەۋمەتتىك جەلىدە كىمدەردى باقىلايتىنىڭىزدى تالداڭىز. پسيحولوگيالىق تىنىشتىعىڭىزدى ساقتاۋ دا - وزىڭىزگە دەگەن قامقورلىقتىڭ ءبىر ءتۇرى.

قولىڭىزدان كەلەتىن نارسەگە نازار اۋدارىڭىز

باسقا ادامداردىڭ شەشىمى، الەمدەگى داعدارىستار، اۋا رايى نەمەسە ينتەرنەتتەگى بەيتانىس جانداردىڭ ارەكەتى - ءبىزدىڭ باقىلاۋىمىزدان تىس نارسەلەر. ال جۇمىسىمىزدى، كۇن ءتارتىبىمىزدى، ۇيدەگى جاعدايدى جانە جاقىندارىمىزبەن قارىم-قاتىناسىمىزدى وزگەرتۋگە مۇمكىندىگىمىز بار.

مازاسىزدىق كۇشەيىپ، وي سان-ساققا جۇگىرە باستاعاندا، نازاردى ءوزىڭىز اسەر ەتە الاتىن دۇنيەلەرگە عانا اۋدارۋعا تىرىسقان ءجون. ءبارىن بىردەي باقىلاۋدا ۇستاۋ مۇمكىن ەمەس. سوندىقتان كۇش- قۋاتتى وزگەرتە الاتىن نارسەلەرگە جۇمساعان دۇرىس.

جۇيكەڭىزدى توزدىراتىن ادامداردان الشاق بولىڭىز

ۇنەمى كوڭىلىڭىزدى تۇسىرەتىن، ءوز ماسەلەسىن سىزگە ارتىپ، ءار كەزدەسۋدەن كەيىن بويىڭىزدى شارشاۋ بيلەيتىن ادامدارمەن قارىم-قاتىناستى شەكتەگەن ءجون. ەگەر ونداي ادامدى ومىرىڭىزدەن مۇلدە الىستاتۋ مۇمكىن بولماسا، جەكە شەكاراڭىزدى بەلگىلەڭىز. ءار شەشىمىڭىزدى قايتا-قايتا ءتۇسىندىرىپ، اقتالۋدىڭ قاجەتى جوق. ءوزىڭىزدى جايسىز سەزىندىرەتىن اڭگىمەلەرگە ارالاسپاۋعا جانە وزگەنىڭ اشۋى مەن رەنىشىن ۇنەمى كوتەرىپ جۇرۋگە مىندەتتى ەمەسسىز.

بۇل كەڭەستەر كوسمەتيكاعا ەمەس، پسيحولوگيالىق ساۋلىققا قاتىستى. ادامنىڭ ىشكى تىنىشتىعى مەن كوڭىل كۇيى سىرتقى كەلبەتىنە دە اسەر ەتەدى. قازىر جان تىنىشتىعىن ساقتاۋ وڭاي ەمەس، سوندىقتان ونى باعالاپ، قورعاۋدى ۇيرەنۋ ماڭىزدى.

ءارتۇرلى ءارى ماۋسىمدىق ونىمدەردى تۇتىنىڭىز

دۇرىس ءارى قۇنارلى تاماقتانۋ مىندەتتى تۇردە قىمبات بولۋى كەرەك دەگەن تۇسىنىك بار. ءبىراق شىن مانىندە، پايدالى اس ءمازىرىن قاراپايىم ونىمدەردەن دە قۇراۋعا بولادى.

قازىر ۇلكەن قالالاردا جىل بويى كەز كەلگەن جەمىس- جيدەكتى تابۋعا بولادى. قىستا قۇلپىناي، جازدا قۇرما ساتىلىپ تۇرادى. ال اۆوكادو جەمەسەڭىز، قۇددى دۇرىس تاماقتانبايتىن سەكىلدى كورىنۋىڭىز مۇمكىن. دەگەنمەن كۇندەلىكتى اس مازىرىندە ماۋسىمدىق ونىمدەرگە دە ورىن بەرگەن ءجون.

مىسالى، كۇز بەن قىستا س دارۋمەنى مەن تالشىققا باي اشىتىلعان قىرىققاباتتى جەۋگە بولادى. جازدا دارۋمەندەر مەن پوليفەنولدارعا باي جيدەكتەردى ءتاتتى دەسەرتتەردىڭ ورنىنا تۇتىنعان پايدالى. سونداي-اق تالشىق پەن وسىمدىك تەكتەس ومەگا-3 ماي قىشقىلدارىنىڭ كوزى سانالاتىن زىعىر ءدانىن، ماگني مەن وسىمدىك اقۋىزىنا باي قاراقۇمىقتى اس مازىرىنە قوسۋعا بولادى.

پايدالى تاماقتانۋ ءۇشىن مىندەتتى تۇردە شەتەلدەن اكەلىنگەن قىمبات ونىمدەردى ىزدەۋدىڭ قاجەتى جوق. اس ءمازىرىنىڭ الۋان ءتۇرلى بولۋى ماڭىزدىراق. سوندا اعزا قاجەتتى دارۋمەندەر مەن مينەرالداردى تەك قوسپالاردان ەمەس، كۇندەلىكتى تۇتىناتىن تاعامنان دا الا الادى.

كۇندەلىكتى تەرى كۇتىمىن ۇمىتپاڭىز

تەرى كۇتىمىنىڭ تيىمدىلىگى قولداناتىن قۇرالداردىڭ كوپتىگىنە نەمەسە ولاردىڭ قۇرامىنداعى بەلسەندى زاتتاردىڭ جوعارى كونتسەنتراتسياسىنا بايلانىستى ەمەس. بۇل ماسەلەدە جۇيەلىلىك الدەقايدا ماڭىزدى.

تەرىنى جۇمساق تازالاۋ، ىلعالداندىرۋ جانە كۇننەن قورعاۋ - كۇندەلىكتى كۇتىمنىڭ نەگىزگى قادامدارى. ال قوسىمشا بەلسەندى كومپونەنتتەردى الەۋمەتتىك جەلىدە تانىمال بولعانى ءۇشىن ەمەس، تەرىڭىزدىڭ قاجەتتىلىگىنە قاراي تاڭداعان دۇرىس.

كۇن سايىن تۇراقتى قولداناتىن قاراپايىم كۇتىم قۇرالدارى كوڭىل كۇيگە قاراي بىردە قولدانىلىپ، بىردە ۇمىت قالاتىن ونداعان ونىمنەن پايدالىراق.

ادەمىلىك وزىڭىزگە دەگەن قامقورلىقتان باستالادى

ادامنىڭ جاقسى كورىنۋى جاڭا كرەم ساتىپ الۋدان ەمەس، ۇيقى رەجيمىنەن، تىنىس الاتىن اۋامىزدان، ءىشىپ-جەيتىن تاعامىمىزدان، كۇندەلىكتى قوزعالىسىمىزدان جانە ومىرىمىزگە قۋانىش سىيلايتىن ساتتەرگە ۋاقىت بولە بىلۋىمىزدەن باستالادى.