«قوڭىراۋ شالۋ، اڭدۋ، ۇيىنە بارۋ»: قاي كەزدە بۇل ارەكەت قىلمىس سانالادى؟

بۇل تۋرالى استانا قالاسىنىڭ اكىمدىگى ءمالىم ەتتى.

قازاقستان رەسپۋبليكاسىنىڭ قىلمىستىق كودەكسىنە سايكەس، ستالكينگ - ادامنىڭ ەركىنەن تىس ونىمەن بايلانىس ورناتۋعا نەمەسە ونى اڭدۋعا باعىتتالعان زاڭسىز ارەكەتتەر. مۇنداي قۋدالاۋ كۇش قولدانۋمەن ۇشتاسپاسا دا، ادامعا ەلەۋلى زيان كەلتىرگەن جاعدايدا قىلمىستىق قۇقىق بۇزۋشىلىق بولىپ سانالادى. بۇل تۋرالى ەلوردانىڭ كوممۋنيكاتسيالار قىزمەتىندە وتكەن بريفينگتە استانا قالاسى الماتى اۋدانى پروكۋراتۋراسى ءبولىمىنىڭ اعا پروكۋرورى ازات باربولوۆ ءتۇسىندىردى.

- ستالكينگ قايتا-قايتا قوڭىراۋ شالۋ، حابارلاما جىبەرۋ، كەزدەسۋگە ۇمتىلۋ، ادامنىڭ ۇيىنە نەمەسە جۇمىس ورنىنا بارۋ، ونى كۇتىپ تۇرۋ، اڭدۋ سياقتى ارەكەتتەردەن كورىنۋى مۇمكىن. سونداي-اق ادام بايلانىس ورناتۋدان باس تارتسا دا، ونىڭ قىر-سوڭىنان اڭدۋ ستالكينگ بەلگىلەرىنىڭ ءبىرى بولۋى ىقتيمال. دەگەنمەن ءاربىر قوڭىراۋ نەمەسە حابارلاما وزدىگىنەن قىلمىستىق قۇقىق بۇزۋشىلىق بولىپ سانالمايدى. ارەكەتكە قۇقىقتىق باعا بەرگەندە ونىڭ سيپاتى مەن قايتالانۋ جيىلىگى، ادامنىڭ كەلىسىمىنىڭ بولماۋى، كەلتىرىلگەن زياننىڭ ەلەۋلىلىگى، سونداي-اق قۋدالاۋ ارەكەتتەرى مەن ولاردىڭ سالدارى اراسىنداعى سەبەپ-سالدارلىق بايلانىس ەسكەرىلەدى، - دەدى اعا پروكۋرورى ازات باربولوۆ.

قىلمىستىق كودەكستىڭ 115-1-بابىندا ستالكينگ ءۇشىن ەكى ءجۇز ايلىق ەسەپتىك كورسەتكىشكە دەيىنگى مولشەردە ايىپپۇل، تۇزەۋ جۇمىستارى، ەكى ءجۇز ساعاتقا دەيىنگى قوعامدىق جۇمىستار نەمەسە ەلۋ تاۋلىككە دەيىنگى قاماق تۇرىندەگى جازالار كوزدەلگەن.

- سوت تاجىريبەسىندە ستالكينگ جاساعان ادامعا جازا تاعايىنداۋمەن قاتار، جابىرلەنۋشىنى قورعاۋعا باعىتتالعان قوسىمشا شارالار دا قولدانىلۋدا. ماسەلەن، استانا قالاسىنىڭ سوتىندا قارالعان ءىس بويىنشا سوتتالۋشى 80 ساعات قوعامدىق جۇمىستارعا تارتىلىپ، وعان التى اي مەرزىمگە جابىرلەنۋشىنى ىزدەۋگە، قۋدالاۋعا جانە ونىمەن بايلانىس ورناتۋعا تىيىم سالىنعان، - دەپ ءتۇسىندىردى مامان.

قازاقستان رەسپۋبليكاسىنىڭ قىلمىستىق كودەكسىنىڭ 98-3-بابىنا سايكەس، سوت ادامنىڭ مىنەز-قۇلقىنا ەرەكشە تالاپتار بەلگىلەي الادى. ءىستىڭ ءمان-جايلارىنا قاراي جابىرلەنۋشىنى ىزدەۋگە، قۋدالاۋعا، وعان بارۋعا، تەلەفون ارقىلى سويلەسۋگە جانە وزگە دە تاسىلدەرمەن بايلانىس ورناتۋعا تىيىم سالىنۋى مۇمكىن.

مامانداردىڭ ايتۋىنشا، ەگەر ادام قايتا-قايتا قالاۋسىز قۋدالاۋعا تاپ بولسا، قوڭىراۋلار مەن حابارلامالاردى وشىرمەي، ساقتاپ قويعانى ءجون. ولار قاجەت بولعان جاعدايدا قۇقىق قورعاۋ ورگاندارىنا دالەل رەتىندە ۇسىنىلۋى مۇمكىن. ستالكينگ ءۇشىن قىلمىستىق جاۋاپتىلىقتىڭ ەنگىزىلۋى ادامنىڭ جەكە شەكاراسىن قورعاۋعا جانە قايتا-قايتا قۋدالاۋ ارەكەتتەرىنىڭ الدىن الۋعا مۇمكىندىك بەرەدى.

بۇعان دەيىن ەلوردادا ستالكينگ ءۇشىن جاۋاپكەرشىلىك كۇشەيگەنىن جازدىق.