قوي ەتىنىڭ ەكسپورتى ەكى ءوستى - ا ش م

استانا. KAZINFORM - اۋىل شارۋاشىلىعى ءمينيسترى ايداربەك ساپاروۆ ۇكىمەت وتىرىسىندا 2025 -جىلدىڭ 5 ايىندا ەلدەگى مال سانى قالاي وزگەرگەنىن ايتتى.

- اۋىل شارۋاشىلىعى جانۋارلارىنىڭ بارلىق تۇرلەرى بويىنشا مال باسى تۇراقتى وسۋدە. جىل باسىنان ءىرى قارا مال باسى %23,4 ارتتى (9,6 ميلليون باس)، ۇساق مال - %7,8 (26,3 ميلليون باس)، جىلقى - %12,2 (5,0 ميلليون باس)، تۇيە - %8,5 (321,3 مىڭ باس)، قۇس - %2,2 (47,7 ميلليون باس) ءوستى، - دەدى ول.

ونىڭ سوزىنشە، قازاقستان شارۋالارى ەت پەن قوي ەتىنە دەگەن ىشكى قاجەتتىلىكتى تولىقتاي قامتاماسىز ەتىپ وتىر.

- 2024 -جىلدىڭ قورىتىندىسى بويىنشا سيىر ەتىنىڭ ەكسپورتى 1,4 ەسە ارتىپ، 22 مىڭ توننادان اسسا، قوي ەتىنىڭ ەكسپورتى 2,2 ەسە ءوسىپ، شامامەن 18 مىڭ توننا بولدى.

جىل باسىنان مال شارۋاشىلىعىندا وڭدەۋ ارتتى. ونىڭ ىشىندە شۇجىق ونىمدەرى - %11,3، ەت كونسەرۆىلەرى - %27,5، توڭازىتىلعان جانە مۇزداتىلعان قوسالقى ونىمدەر تيىسىنشە %41,9 جانە %47,1 ءوستى، - دەدى ايداربەك ساپاروۆ.

بۇعان دەيىن قازاقستاندا اۋىل شارۋاشىلىعىن سيفرلاندىرۋ قالاي ءجۇرىپ جاتقانىنا شولۋ جاساعان ەدىك.

اۆتور

ەسىمجان ناقتىباي