قوسىلعان قۇن سالىعى قايتا قارالىپ جاتىر - تامارا دۇيسەنوۆا
استانا. KAZINFORM - وسىدان ءبىر اپتا بۇرىن بەلگىلى بولعانداي ەلىمىزدە قوسىلعان قۇن سالىعى وسپەيدى. قازىر ارنايى جۇمىس توبى ونى قايتا قاراپ جاتىر. بۇل تۋرالى پرەمەر-ءمينيستردىڭ ورىنباسارى تامارا دۇيسەنوۆا ءمالىم ەتتى.
«جۋىردا ۇكىمەت باسشىسى ۇلتتىق ەكونوميكا مينيسترلىگىنە قوسىلعان قۇن سالىعىن ءوسىرۋدى توقتاتىپ، قايتا قاراۋدى تاپسىردى. قازىر جۇمىس توبى بۇل سۇراقتى قايتا قاراپ جاتىر، سىزدەرگە اقپارات بەرىلەدى»، - دەدى تامارا دۇيسەنوۆا سەنات قابىرعاسىندا ب ا ق وكىلدەرىنىڭ ساۋالىنا جاۋاپ بەرە تۇرىپ.
ءتىلشىنىڭ قوسىلعان قۇن سالىعىندا قانداي وزگەرىستەر بولۋى مۇمكىن دەگەن ناقتىلاۋ سۇراعىنا: «جۇمىس توبىنىڭ مۇشەلەرى وزدەرى جاريالايدى» دەدى.
ەسكە سالا كەتسەك، 13- اقپاندا وتكەن ۇكىمەت وتىرىسىندا پرەمەر-مينيستر ولجاس بەكتەنوۆ قوسىلعان قۇن سالىعىنىڭ وسپەيتىنىن ايتقان ەدى.
«قوسىلعان قۇن سالىعىنىڭ ستاۆكاسى كوتەرىلمەيدى. ۇلتتىق ەكونوميكا مينيسترلىگى مەن قارجى مينيسترلىگى رەسپۋبليكالىق بيۋجەتتىڭ شىعىس جانە كىرىس بولىگىن ساپالى جوسپارلاۋدى قامتاماسىز ەتۋى كەرەك»، - دەگەن ەدى ۇكىمەت باسشىسى.
