قوستانايلىق ۇستاز ادەبي شىعارمالاردى كوميكسكە اينالدىردى
قوستاناي قالاسىنداعى 17-مەكتەپتىڭ مۇعالىمى اقبوتا ەرماعانبەتوۆا وقۋشىلاردى كىتاپ وقۋعا قىزىقتىرۋدىڭ ەرەكشە ءادىسىن ويلاپ تاپقان. بۇل تۋرالى وقۋ-اعارتۋ مينيسترلىگى ءمالىم ەتتى.
ول جاساندى ينتەللەكت ارقىلى قازاق ادەبيەتىنىڭ شىعارمالارىن كوميكسكە بەينەلەيدى. وسىلايشا، وقۋشىلار كوركەم شىعارما كەيىپكەرلەرىن سۋرەت ارقىلى وڭاي تاني الادى. اۆتور شىعارما ءتىلىن بالا جەڭىل تۇسىنەتىندەي ەتىپ وڭدەپ، شاعىن ماتىنمەن تولىقتىرادى.
جاس پەداگوگتىڭ كوميسكە بەينەلەنگەن تۋىندىلارىنىڭ قاتارىندا م. دۋلاتوۆتىڭ «باقىتسىز جامال»، ب. مايليننىڭ «شۇعانىڭ بەلگىسى»، ت. نۇرماعانبەتوۆتىڭ «اناسىن ساعىنعان بالا» جانە قورقىت اتا، ت. ابدىك پەن ا. التاي شىعارمالارى بار. مۇعالىم بارلىق اۆتورلىق قۇقىقتاردى Egov.kz پورتالى ارقىلى تىركەگەن.
«ماتىندەردى وقۋشىلاردىڭ جاس ەرەكشەلىكتەرىنە قاراي بەيىمدەپ، سويلەمدەردى قىسقارتىپ، ماتەريالدى وڭاي ءارى تۇسىنىكتى قابىلداۋعا مۇمكىندىك جاسايمىز. كوميكستەر - بۇل تەك قىزىقتى فورمات قانا ەمەس، ولار وقۋشىلاردىڭ نازارىن اۋدارىپ، سيۋجەتتەردى جاقسى ەستە ساقتاۋعا كومەكتەسەدى»، - دەيدى اقبوتا ەرماعانبەتوۆا.
جاس پەداگوگتىڭ وقۋشىلارى ساباققا بەلسەنە قاتىسادى جانە وبلىستىق، رەسپۋبليكالىق بايقاۋلاردان جۇلدەلى ورالىپ ءجۇر. اقبوتا ەرماعانبەتوۆانىڭ جوباسى پەداگوگتار اراسىندا دا تانىمال، وسىعان دەيىن بىرنەشە رەت رۋسپۋبليكالىق پەداگوگيكالىق بايقاۋلاردىڭ لاۋرەاتى اتاندى.
قازىرگى تاڭدا ىزدەنىمپاز ۇستاز قازاقستاندا، رەسەيدە جانە جاپونيادا جاريالانعان 30 دان استام عىلىمي ماقالالار مەن 5 ادىستەمەلىك قۇرالدىڭ اۆتورى. ءبىراق، ەڭ باستىسى - ونىڭ يدەيالارى وقۋشىلاردىڭ جۇرەگىندە ءىز قالدىرىپ، قازاق ادەبيەتىن ءار بالانىڭ جۇرەگىنە جاقىنداتۋدا.
