قوستانايلىق فەرمەرلەر «كەڭ دالا 2» باعدارلاماسىنىڭ يگىلىگىن كورىپ وتىر
استانا. KAZINFORM - اگرارلىق نەسيە كورپوراتسياسى كوكتەمدە جاڭا «كەڭ دالا 2» باعدارلاماسىن ىسكە قوستى.
بۇل باعدارلامانىڭ يگىلىگىن قوستاناي وبلىسىنىڭ فەرمەرلەرى كوردى. ماسەلەن، 10 مىڭ گەكتارعا ارپا، بيداي سۇلى ەگەتىن «نۇر توبا» ج ش س اتالمىش باعدارلاما ارقىلى %5 بەن نەسيە الىپ، شارۋاسىن ويداعىداي اتقارعان.
«اگرارلىق نەسيە كورپرواتسياسى شارۋالارعا ءتيىمدى شارتتارمەن قولداۋ كورسەتەدى. قازىر ۇستەمەسى %5 بولاتىن «كەڭ دالا-2» باعدارلاماسى ءجۇرىپ جاتىر. ەگىنىمىزدى جيناپ بولعان سوڭ 2025-جىلعى جوسپارىمىزدى قاراپ، قۇجات تاپسىرامىز. ەگەر مۇنداي باعدارلامالار بولماسا قينالىپ قالامىز»، - دەيدى «نۇر توبا» ج ش س ديرەكتورى ەرمەك جۇمابەكوۆ.
قوستاناي وبلىسىنىڭ التىنسارين اۋدانىنداعى «بالتالى Ltd» دە اتالمىش باعدارلامانىڭ يگىلىگىن كورگەن. ولار نەسيەنى ءتيىمدى پايدالانىپ، ەگىن ەگۋ جۇمىستارىن ءساتتى جۇرگىزگەن. تىڭايتقىشتار مەن زيانكەستەرگە قارسى ءدارى-دارمەكتەرىن دە قامداپ العان. سەرىكتەستىكتىڭ اگرونومى ۆاسيلي كاپيستەرنيتسكي اگرارلىق نەسيە كورپوراتسياسىنىڭ قولداۋىنىڭ ارقاسىندا جۇمىستارى دەر كەزىندە اتقارىلعانىن ايتادى.
«بيىل اۋا رايى اسا قولايلى بولعان جوق. دەگەنمەن ورتاشا ەسەپپەن گەكتارىنان 12 سەنتنەردەن ءونىم الىپ جاتىرمىز. باعدارلاما ارقىلى العان نەسيەنىڭ كومەگى كوپ بولدى»، - دەيدى «بالتالى Ltd» ج ش س اگرونومى.
اگرارلىق نەسيە كورپوراتسياسى بيىل ەلىمىزدىڭ اۋىل شارۋاشىلىعى تاۋارىن وندىرۋشىلەرىن 420 ميلليارد تەڭگەدەن استام سومامەن قارجىلاندىرعان. ونىڭ 320 ميلليارد تەڭگەسى ەگىن ەگۋ مەن جيىن-تەرىم جۇمىستارىنا جۇمسالعان.
مەملەكەتتىك قولداۋدىڭ جاڭا ماحانيزمىنە سايكەس كەپىل مۇلكى جەتپەيتىن فەرمەرلەردىڭ «كەڭ دالا 2» باعدارلاماسى بويىنشا العان قارىز سوماسىنىڭ %85 ىن «دامۋ» كاسىپكەرلىكتى دامىتۋ قورى كەپىلدەندىرەتىن بولدى. اگرارلىق نەسيە كورپوراتسياسى قارجىلاندىرۋ جولدارىن ۇلعايتۋ ارقىلى فەرمەرلەر ءۇشىن قولايلى جاعدايلار جاسادى. نەسيەنى كورپوراتسيا فيليالدارىنان، كرەديتتىك سەرىكتەستىكتەر، ەكىنشى دەڭگەيلى بانكتەر، الەۋمەتتىك-كاسىپكەرلىك كورپوراتسيالار جانە ميكروقارجى ۇيىمدارى ارقىلى الۋعا بولادى.
وتكەن جىلى اگرارلىق نەسيە كورپوراتسياسى مەن قازاگروقارجىنىڭ قارجىلاندىرۋ كولەمى 554,7 ميلليارد تەڭگەنى قۇرادى. بيىل جىل سوڭىنا دەيىن قارجىلاندىرۋ سوماسى 700 ميلليارد تەڭگەدەن اسادى دەپ جوسپارلانۋدا.
