قوستانايدا توتەنشە جاعداي جاريالاندى
قوستاناي. KAZINFORM - قوستاناي قالاسىنىڭ تاسقىنعا قارسى جەدەل شتابىنىڭ مالىمەتىنشە، قاراتومار سۋ قويماسىنان كوپ كولەمدە سۋ اعىزىلۋىنا بايلانىستى، جاعداي ۋشىققان. تۇرعىنداردى شۇعىل قاۋىپسىز جەرلەرگە كوشىرۋ قولعا الىندى. بۇل تۋرالى «قوستاناي تاڭى» گازەتى جازدى.
وسى جىلى، «قازگيدرومەتتىڭ» بولجامى بويىنشا، ەڭ ءىرى جوعارى توبىل جانە قاراتومار سۋ قويمالارىنا جالپى كوكتەم ماۋسىمىندا 450 دەن 700 ميلليون تەكشە مەترگە دەيىن سۋ ءتۇسۋى ىقتيمال دەلىنگەن-دى. مۇنىڭ ءوزى - جىلدىق ورتاشا 413 ميلليون تەكشە مەتر مەجەمەن العانداعى جورامال ەدى. الايدا سوڭعى 2 كۇندە قوس قويماعا 1 ميلليارد تەكشە مەتر سۋ جينالدى. ماماندار مۇنشالىق اۋقىمداعى سۋدى 1980 -جىلدان بەرى كورمەگەندەرىن ايتىپ وتىر.
قازىرگى ۋاقىتتا، قاراتومار سۋ قويماسىنىڭ شامادان تىس تولىپ كەتۋىنە بايلانىستى، ارتىق سۋدى اعىزۋ سەكۋندىنا 10 تەكشەدەن باستالىپ، 1,5 مىڭ تەكشە مەترگە دەيىن جەتكىزىلدى. ال مۇنىڭ سالدارى قالانىڭ جاعالاۋعا جاقىن اۋماقتارىنا زور قاۋىپ-قاتەر ءتوندىرىپ تۇر. اتاپ ايتقاندا، «دوروجنيك»، «سادوۆود»، «ميچۋرينەتس» باۋ-باقشا قونىستارىن جانە «كولەسنىە ريادى» اۋدانىن سۋ جايلاۋى مۇمكىن.
«اتالعان اۋماقتاردىڭ تۇرعىندارى قۇزىرەتتى ورگاندار ءبىرىنشى تالاپ ەتكەن ساتتەن باستاپ، ۇيىمداسقان تۇردە ەۆاكۋاتسياعا كىرىسۋى كەرەك. بۇل شارادا ەگدە كىسىلەرگە، ءجۇرىس-تۇرىسى قيىن ازاماتتار مەن بالالارعا ەرەكشە كوڭىل ءبولۋ سۇرالادى. الدىن الا قۇجاتتارىڭىز بەن العاشقى قاجەتتىلىگى بار زاتتارىڭىزدى دايارلاپ قويىڭىزدار. سىزدەرگە اۆتوبۋستار جىبەرىلىپ، ولار ەۆاكوپۋنكتتەرگە قاتىنايدى. ۋاقىتشا قونىستاردا اس-اۋقات جانە جاتىن ورىن ازىرلەنگەن»، - دەلىنەدى قالالىق شتاب حابارلاماسىندا.
قوستاناي قالاسى اۋماعىندا تۇرعىنداردى ەۆاكۋاتسيالاۋعا ارنالعان بىرنەشە پۋنكت ازىرلەنىپ قويىلعان. ولار:
- ق ر ءى ءى م اكادەمياسىنىڭ جاتاقحاناسى؛
- قوستاناي يندۋستريالىق- پەداگوگيكالىق كوللەدجى؛
- قوستاناي اۆتوموبيل كولىگى كوللەدجى؛
- قوستاناي قىزمەت كورسەتۋ سالالارى كوللەدجى؛
- قوستاناي قۇرىلىس كوللەدجى؛
- «درۋجبا» پروفيلاكتورياسى؛
- № 2-مەكتەپ-ليتسەي سپورت زالى؛
- № 14 ج ب ب م؛
- س. ماۋلەنوۆ اتىنداعى گيمنازيا؛
- № 19 جانە № 20-مەكتەپتەر؛
- فيزيكا-ماتەماتيكا ليتسەيى.
«قۇرمەتتى قوستانايلىقتار! ەۆاكۋاتسيا كەزىندە دۇربەلەڭگە سالىنباي، قۇقىق قورعاۋ ورگاندارى مەن ت ج قىزمەتكەرلەرىنىڭ زاڭ جۇزىندەگى بارلىق تالاپتارىن ورىنداۋلارىڭىزدى سۇرايمىز! ەگەر تاسقىن جەڭىل وتەر بولسا، ادامدار قالدىرىپ كەتكەن تۇرعىن ءۇي الاپتارىن ءتارتىپ ساقشىلارى كۇزەتەتىن بولادى»، - دەلىنەدى شتاب ۇندەۋىندە.
سونداي-اق قاجەت جاعدايدا 102 نەمەسە 109 تەلەفون نومىرلەرى ارقىلى ءتيىستى ورىندارعا جۇگىنۋگە بولادى.
قوستاناي اۋدانىندا توتەنشە جاعداي رەجيمى ەنگىزىلدى
قوستاناي اۋدانى اكىمىنىڭ 2024 -جىلعى 5-ساۋىردەگى № 4-شەشىمىمەن، اۋدان اۋماعىندا قالىپتاسقان گيدرولوگيالىق جاعدايعا بايلانىستى، جەرگىلىكتى اۋقىمداعى تابيعي سيپاتتاعى توتەنشە جاعداي جاريالاندى.
وزەندەردەگى سۋ دەڭگەيىنە تاۋلىك بويى مونيتورينگ جۇرگىزىلىپ جاتىر. جاعالاۋدى نىعايتۋ، ەرىگەن قار سۋىن سورۋ جانە اعىن باعىتىن بۇرۋ جۇمىستارى جالعاسۋ ۇستىندە.
كوكتال اۋىلىنىڭ تۇرعىندارى قاۋىپسىز جەرگە كوشىرىلدى
اۋليەكول اۋدانىندا تەرەكتى وزەنى دەڭگەيىنىڭ كوتەرىلۋىنە بايلانىستى كوكتال اۋىلىنان 32 ادام قاۋىپسىز جەرگە كوشىرىلدى. ءبىرىنشى كەزەكتە زەينەتكەرلەر مەن بالالار الدىن الا ەۆاكۋاتسيالانىپ وتىر. ەۆاكوپۋنكت اۋليەكول باستاۋىش مەكتەبى جانىنداعى ينتەرناتتا ورنالاسقان.
جەرگىلىكتى اتقارۋشى ورگاندار سۋ اعىنى الدىن قاپشىقتارمەن بوگەۋ، سۋ سورعىلاۋ، ينەرتتى ماتەريالداردى ءۇيۋ، تولتىرۋ، اينالما ارنالار جىلۋ جۇمىستارىن جۇرگىزدى.
