قوستانايدا سالماعى 6 كەلىگە جۋىق الىپ ءسابي دۇنيەگە كەلدى
قوستاناي. KAZINFORM - رۋدنىي قالالىق كوپسالالى اۋرۋحاناسىنىڭ پەريناتالدىق ورتالىعىندا سالماعى 5900 گرامم ۇل بالا دۇنيەگە كەلدى، دەپ حابارلايدى Kazinform نىڭ مەنشىكتى ءتىلشىسى.
باسپاءسوز قىزمەتىنىڭ حابارلاۋىنشا، نارەستە 15- قاڭتاردا دۇنيەگە كەلگەن. ونىڭ سالماعى - 5900 گرامم، بويى 59 س م بولدى. ۇل بالاعا ەليزار ەسىمى بەرىلدى. قازىرگى كەزدە اناسى الەنا ديزينا ەكەۋىنىڭ جاعدايى جاقسى.
بوسانۋ حيرۋرگيالىق جولمەن ءوتتى. جاڭا تۋعان نارەستە پەرزەنتحانادان شىعار الدىندا كۇش- قۋات جيناپ جاتىر. جۇكتىلىگىنىڭ 40 اپتاسىندا اناسى ءجىتىقارا اۋداندىق اۋرۋحاناسىنان رۋدنىي پەريناتالدى ورتالىعىنا جىبەرىلدى.
- ماعان ىشتەگى بالامنىڭ ۇلكەن ەكەنىن ايتتى. ءبىراق رۋدنىيدا نارەستەنىڭ سالماعى 5 كەلىدەن الدەقايدا جوعارى ەكەنى انىقتالدى. ارينە، ءوزىم دە، اينالاداعىلاردىڭ ءبارى دە تاڭعالدى. ۇلكەن قىزىم دۇنيەگە كەلگەندە سالماعى 3,5 ك گ بولدى. ءبىرىنشى بوسانۋىم تابيعي جولمەن ءوتتى. ۇل بالامدى بوساناردا كەسار تىلىگىن جاسادىق. ءقازىر ءبارى جاقسى، ەندى ۇيگە قايتقىمىز كەلىپ وتىر، - دەدى جاڭا تۋعان باتىردىڭ اناسى.
دارىگەرلەر وتا جاساۋ تۋرالى شەشىم انا مەن بالانىڭ قاۋىپسىزدىگى ءۇشىن قابىلدانعانىن ايتتى.
- ءجىتىقارادا ۋدز دارىگەرى نارەستەنىڭ سالماعى 5700 گرامم دەپ انىقتاپ، بىرنەشە رەت تەكسەردى. ۋلترادىبىستىق اپپارات 600-700 گرامم قاتە كورسەتۋى مۇمكىن، ءبىراق ناۋقاسقا جوسپارلى تۇردە وتا جاساۋ تۋرالى شەشىم قابىلداندى. ايەل قورىقتى، ۋايىمدادى، ءبىراق ءوزىن سابىرلى ۇستادى جانە بىزگە سەندى. ابىروي بولعاندا وتا ءساتتى اياقتالدى. بالاعا قارقىندى تەراپيا قاجەت بولعان جوق، ءبىز تەكسەرۋ جۇرگىزدىك. قانت دەڭگەيى قالىپتى، اناسى جۇكتىلىك كەزىندە قانت ديابەتىمەن اۋىرماعان، تەك ءىسىنۋ بولعان، كەيدە قان قىسىمى كوتەرىلگەن. قازىرگى كەزدە انا مەن بالا وزدەرىن جاقسى سەزىنەدى. بۇل جەردە جۇمىس ىستەپ جۇرگەنىمە كوپ بولعان جوق. الايدا ەڭبەك تاجىريبەمدە مۇنداي ۇلكەن نارەستەنى ءبىرىنشى رەت كورىپ تۇرمىن. كولەمى جاعىنان باسقا سابيلەردەن ەرەكشەلەنەتىنىن اڭعارۋعا بولادى. ءتىپتى ماعان ول بىرنەشە اپتادان كەيىن سويلەپ كەتەتىن سياقتى كورىنەدى، - دەدى دارىگەر اياكوز سىدىقبايەۆا.
بۇعان دەيىن جامبىل وبلىسىندا سالماعى 6 كەلىدەن اساتىن ءسابي ومىرگە كەلدى.
