قوستانايدا سۋ تاسقىنى زالالى ەسەپتەلىپ، وتەماقى بەرىلىپ جاتىر

استانا. KAZINFORM - قوستاناي وبلىسىندا سۋ تاسقىنىنان زارداپ شەككەندەرگە 187 ميلليون تەڭگە الەمۋەتتىك تولەم بەرىلدى. بۇل تۋرالى وبلىس اكىمىنىڭ ورىنباسارى ەرلان سپانوۆ ايتىپ بەردى.

ءوڭىردىڭ ەكى قالاسىندا جانە 4 اۋدانىندا توتەنشە جاعداي جاريالانعان.

«اتالعان اۋماقتاردىڭ بارلىعىندا زارداپ شەككەندەرگە زالالدى وتەۋ بويىنشا كوميسسيالار قۇرىلىپ، جۇمىس جاساپ جاتىر. تولەم تۋرالى شەشىمدەردى كوميسسيالار جىلجىمايتىن، جىلجىمالى مۇلىك پەن مالدى باعالاۋدان كەيىن جانە تەحنيكالىق تەكسەرۋدەن كەيىن قابىلدايدى»، - دەدى سپيكەر رەسپۋبليكالىق اقپاراتتىق شتابتا وتكەن بريفينگتە.

بۇگىنگى كۇنى 609 ءۇي تەكسەرىلدى، قالپىنا كەلتىرىلمەيتىن 269 ءۇي يەسىنە جاڭا باسپانا بەرىلەدى.

زارداپ شەككەن حالىققا الەۋمەتتىك قولداۋ جۇمىستارى سۋ تاسقىنىنىڭ العاشقى كۇندەرىنەن باستاپ جۇرگىزىلۋدە. ازىرگە 828 ءوتىنىش بويىنشا 187 ميلليون تەڭگە تولەندى، وتىنىشتەردى قابىلداۋ جانە تولەۋ جۇمىستارى جالعاسۋدا.

سونىمەن قاتار سۋ تاسقىنى سالدارىنان 976 مال قىرىلعان. ازىرگە ونىڭ 214 ءى بويىنشا تولەم جاسالدى.

«ەلەكتر جەلىلەرىنىڭ 1414 تىرەگى زاقىمدالعان، سونىڭ ىشىندە 52 جوعارى ۆولتتى تىرەك بار. بارلىق ءىرى ەلدى مەكەندەردە ەلەكترمەن جابدىقتاۋ قالپىنا كەلتىرىلدى، ءبىراق شامامەن 16 شاعىن ەلدى مەكەن ءالى كۇنگە دەيىن ەلەكتر قۋاتىنسىز قالىپ وتىر. قازىرگى ۋاقىتتا سمەتا ازىرلەندى، قاجەتتى ماتەريال مەن تىرەكتەر دايىندالۋدا»، - دەپ تولىقتىردى ە. سپانوۆ.