قوستانايدا جارىلعان عيماراتتىڭ استىندا تاعى ءۇش ادام بولۋى مۇمكىن – ت ج د

قوستاناي وبلىسى ت ج د باسشىسى قايرات قاسىم امانگەلدى كەنتىندەگى عيماراتتىڭ وپىرىلۋىنىڭ ءمان-جايىن ءبولىستى.

ونىڭ ايتۋىنشا، ءۇيىندى استىندا تاعى ءۇش ادامعا دەيىن بولۋى مۇمكىن. اڭگىمە وسى عيماراتتا جۇمىس ىستەگەن كومپانيا قىزمەتكەرلەرى تۋرالى بولىپ وتىر. الايدا ءۇيىندى استىندا كاسىپورىننىڭ قانشا كليەنتى بولۋى مۇمكىن ەكەنى بەلگىسىز، دەپ حابارلايدى Kazinform ءتىلشىسى.

«كامازسەنتر» اۋماعىندا گاز-اۋا قوسپاسى جارىلعانى تۋرالى حابار ءتۇستى. عيمارات وپىرىلىپ قۇلادى. ساعات 15:00 دە ءۇيىندى استىنان ءۇش ادامدى الىپ شىعا الدىق. ونىڭ ءبىرىنىڭ جاعدايى اۋىر. الدىن الا ءتىزىم بويىنشا، وقيعا سالدارىنان 12 ادام زارداپ شەكتى، ولارعا مەديتسينالىق كومەك كورسەتىلگەن. ەكەۋى ۇيىنە جىبەرىلدى، قالعانى ءالى اۋرۋحانادا. جۇمىس بەرۋشىلەردىڭ ءتىزىمى بويىنشا ءۇيىندى استىندا ءۇش ادامعا دەيىن بولۋى مۇمكىن، ءبىراق ۇيىمعا قاتىسى جوق تاعى قانشا ادام بار ەكەنى بەلگىسىز. ياعني، بۇل كليەنتتەر بولۋى مۇمكىن. سوندىقتان قازىر جۇمىس ءجۇرىپ جاتىر. كاسىپورىننىڭ قانداي قىزمەت كورسەتكەنىن قازىر ايتا المايمىن. كولىك جوندەۋ، مۇمكىن. ۇيىم باسشىلىعىنىڭ ءتىزىمى بويىنشا ولار ءۇش قىزمەتكەردى ەسەپكە الماعان»، - دەدى تىلشىلەرگە قوستاناي وبلىسى ت ج د باسشىسى قايرات قاسىم.

ونىڭ ايتۋىنشا، قۇرىلىستىڭ اۋقىمى مەن زاقىمدانعان تەحنيكانىڭ كوپ ىبىرسۋىنان ىزدەۋ جۇمىسى قيىنداپ تۇر.

«قاجەت تەحنيكانى ايداپ اكەلدىك. كران ورناتۋ ءۇشىن پلاتسدارم ازىرلەۋ جۇمىستارى جۇرگىزىلگەن. ءۇيىندى استىندا قالىپ قويعاندارعا زيان كەلتىرمەس ءۇشىن كۇردەلى ايلا-شارعى جۇرگىزۋدەن قورقامىز. سوندىقتان كۇردەلى جۇمىس قولدان اتقارىلىپ جاتىر»، - دەپ قوسىپ ءوتتى ق. قاسىم.

ەسكە سالا كەتسەك، بۇگىن قوستانايدا 7 ادام قيراعان ءۇيدىڭ استىندا قالىپ قويعانى حابارلانعان ەدى.

كەيىن ءۇش ادام ءۇيىندى استىنان شىعارىلدى.

جەدەل كومەك قىزمەتى 4 ادام - قوستاناي وبلىستىق اۋرۋحاناسىنا، 7 ادام - قوستاناي قالالىق اۋرۋحاناسىنا جەتكىزىلگەنىن ءمالىم ەتتى.