قوستاناي قۋاڭشىلىق سالدارىمەن قالاي كۇرەسىپ جاتىر

 قوستاناي وبلىسىنىڭ اكىمى قۇمار اقساقالوۆ وڭىردەگى قۋاڭشىلىق سالدارىمەن قالاي كۇرەسىپ جاتقانىن ايتتى، دەپ حابارلايدى Kazinform.

«كەيىنگى بىرنەشە جىلدا قوستاناي وبلىسىنىڭ اۋماعىندا قۋاڭشىلىق بولدى. ءبىزدىڭ بىلۋىمىزشە، وسى قۇرعاق جىلدار اۋىل شارۋاشىلىعىنىڭ دامۋىنا قاتتى اسەر ەتكەن. كەلەشەكتە وسىنداي تەگەۋرىننىڭ الدىن الۋ ءۇشىن نە ىستەلىپ جاتىر؟ » ، - دەپ سۇرادى جۋرناليست ورتالىق كوممۋنيكاتسيالار قىزمەتىندە وتكەن بريفينگتە.

اكىمنىڭ ايتۋىنشا، قوستاناي ءوڭىرىنىڭ حالقى ءالى دە كليماتتىڭ وزگەرىسىن تىكەلەي سەزىنىپ كەلەدى.

«مىسالى، كەيىنگى بەس جىلدا قوستاناي وبلىسىنىڭ اۋماعىندا قۇرعاقشىلىق بولدى. اسىرەسە 2019 جانە 2021 -جىلدار وتە قۇرعاق بولدى. 2023 -جىلى كەرىسىنشە، جەر- كوكتى سۋ الدى. تامىز، قىركۇيەك ايلارىندا 180 ميلليمەتر جاۋىن- شاشىن ءتۇستى. بۇل كوپجىلدىق ورتاشا نورمادان 2,5 ەسە كوپ. ارينە، بۇل بيداي ساپاسىنا اسەر ەتتى. سوندىقتان قازىر كاسىپكەرلەردى ىلعال ۇنەمدەيتىن تەحنولوگيا قولدانۋدى ناسيحاتتاۋعا اۋرە بولىپ جاتقان جوقپىز. ولاردىڭ «اۋزى كۇيدى» . وزدەرى- اق ىلعال ۇنەمدەيتىن تەحنولوگيالاردى قولدانىپ جاتىر. بىزدەگى القاپتىڭ 2 ميلليون گەكتارىنا ىلعال ۇنەمدەۋ تاسىلدەرى قولدانىلادى. ول تەحنولوگيالار قىستان باستاپ، قار تۇسكەن كەزدەن باستالۋى كەرەك. بۇل قاراپايىم تەحنولوگيالار»، - دەدى قۇمار اقساقالوۆ.

ءوڭىر باسشىسى وڭىردە سۋارمالى جەردى يگەرۋگە كوڭىل بولىنەتىنىن ەسكە سالدى.

«سونداي- اق سۋارمالى جەرلەرمەن دە جۇمىس ىستەۋ كەرەك. ازىرگە سۋارمالى القاپتىڭ اۋدانى 7 مىڭ گەكتاردى الىپ جاتىر. وسى اۋداندى كەمىندە ەكى ەسە ارتتىرۋ كەرەك. وسىنداي جوسپارىمىز بار جانە مەملەكەت سۋارمالى جەر يگەرەتىن شارۋالاردىڭ شىعىنىن جەڭىلدەتەتىن شارالار قولدانىپ جاتىر»، - دەدى وبلىس اكىمى.