قوستاناي جىلقى تۇقىمى جويىلىپ كەتۋدىڭ ءسال الدىندا تۇر
استانا. قازاقپارات - مەملەكەت تاراپىنان قارجىلاندىرۋ توقتاعالى بەرى قوستاناي جىلقى زاۋىتىنىڭ جاعدايى قۇلدىراي باستادى.
ءبىراز جىل جۇرگىزىلگەن جاڭعىرتۋ جۇمىستارى دا تۇرالاپ قالدى. اۋىل شارۋاشىلىعى مينيسترلىگىنە قاراستى كاسىپورىندا كەزىندە 300 دەن استام جىلقى بولعان. بۇگىندە ۇشتەن ءبىرى قالدى. قوستانايداعى «قازاق تۇلپارى» جىلقى زاۋىتىنىڭ ىرگەتاسى 1880-جىلدارى قالانعان. سول كەزدەرى دە مۇندا اسىلتۇقىمدى جىلقى الۋ جۇمىستارى جۇرگىزىلگەن. سالت- جەگىندى قوستاناي تۇقىمىن بەكىتۋ تۋرالى قاۋلى دا بار. 2000 -جىلدان زاۋىتتا سپورتتىق باعىتتاعى قازاق قازاناتىن جەتىلدىرۋ جۇمىستارى باستالدى. ىرىكتەلىپ، سۇرىپتالىپ، اعىلشىن، اراب جانە جەرگىلىكتى جىلقىنى بۋدانداستىرۋ ارقىلى قىل قۇيرىقتى تۇلپاردىڭ جاڭا ءتۇرى الىندى.
سەرىك سماعۇلوۆ، شاباندوز:
- نەگىزى قوستاناي جىلقى كۇرەڭ قاسقا بولىپ كەلەدى وسىلاي. ولار الىسقا شىدامدى. اياقتارى مىقتى. سىڭىرلەرى جۋانداۋ بولىپ كەلەدى. سوسىن تۇياقتارى دا مىقتى بولىپ كەلەدى بۇلاردىڭ. بۇل جۇرىسكە دە جاقسى. الىسقا دا بارادى. 120 عا شابادى بۇلار نەگىزى. 10 جىل بۇرىن جىلقى زاۋىتىن مەملەكەت تاراپىنان قارجىلاندىرۋ توقتادى. سودان بەرى سەلەكتسيالىق جۇمىس ءجوندى جۇرمەدى. كاسىپورىن بازاسىندا ەلىمىزدە بىرەگەي يممۋنوگەنەتيكالىق، بيوتەحنيكالىق زەرتحانالار مەن جاساندى ۇرىقتاندىرۋعا ارنالعان قوندىرعىلار بار. وسىنىڭ ءبارى بۇگىندە قاڭىراپ تۇر. جۇمىسشىلار دا بىرنەشە ايدان بەرى جالاقى الماعان. جالپى وسى جىلدار ىشىندە قوستاناي جىلقى تۇقىمى ءوز ىسىنە شىن بەرىلگەن جانداردىڭ ىنتا-جىگەرىنىڭ ارقاسىندا ساقتالىپ قالدى. قازىر قالعان 92 باس جىلقىنى قىستان امان الىپ شىقساق يگى دەپ وتىر.
ۆيتالي گوفمان، «قازاق تۇلپارى» جىلقى زاۋىتىنىڭ زووتەحنيگى:
- وتاندىق بىرەگەي جىلقى تۇقىمىن ساقتاپ قالۋدى ۇرپاق الدىندا پارىزىمىز دەپ بىلەمىن. جوقتان بار جاساپ، سوعان تىرىسىپ جاتىرمىز. ءوز كۇشىمىزبەن جەمشوبىن دايىناپ، قورا-قوپسىنى جاماپ-جاسقاپ الدىق. سپورتتىق باعىتتاعى ءبىر جىلقىنىڭ كۇتىم-باعىمىنا جىلىنا ءبىر ميلليون تەنگەدەن استام قارجى قاجەت. مەملەكەت قولداۋىنسىز ونى ىسكە اسىرۋ مۇمكىن ەمەس. اۋىل شارۋاشىلىعى قىزمەتكەرلەرىنىڭ فورۋىمىندا مەملەكەت باسشىسى قوستاناي جىلقىسى جويىلىپ كەتۋدىڭ ءسال الدىندا تۇرعانىن ايتىپ، ونىڭ سانى مەن ساپاسىن ارتتىرۋدى مىندەتتەگەن بولاتىن. زاڭعا ەنگىزىلگەن وزگەرىستەرگە بايلانىستى ەندى جىلقىنى اسىلداندىرۋ باعىتىنداعى سەلەكتسيا، كۇتىپ- باعۋ شىعىندارى سۋبسيديالانادى.
اسلان مولداش، وبلىستىق اۋىل شارۋاشىلىعى جانە جەر قاتىناستارى باسقارماسىنىڭ ءبولىم باسشىسى:
- عىلىمي ينستيتۋتتار سونىڭ نورماتيۆىن، سوسىن اناۋ كريتەري دەيدى، سونى بىزگە ۇسىنۋ كەرەك. رەكومەنداتسيا رەتىندە، سونى ازىرلەۋ بويىنشا جۇمىستار اتقارىلىپ جاتىر. سەلەكسيالىق جۇمىستار مەن قازاقستان بويىنشا قوستاناي تۇقىمى قانشا بار، سونى ساناۋ جۇمىستارى. كەزىندە 300 باسقا دەيىن بولعان دەيدى عوي. سوعان جاقىنداساق، دۇرىس بولار ەدى ەندى. ەل پرەزيدەنتى سونداي-اق ۇكىمەتكە جىلقى شاراۋشىلىعى ينستيۋتىن قۇرۋدى تاپسىردى. الداعى بەس جىلدىڭ ىشىندە اسىلتۇقىمدى جىلقى ۇلەسىن %6-7 كە كوبەيتۋ جوسپارلانىپ وتىر.
