قوستاناي اۋەجايىندا اۋەگە كوتەرىلگەن ۇشاقتىڭ شاسسي دوڭگەلەگى ورتەندى
استانا. KAZINFORM - وقيعانى Qazaq Air اۋە كومپانياسىنىڭ باسپا ءسوز قىزمەتى راستادى. تەحنيكالىق تەكسەرۋ جۇرگىزۋ ءۇشىن وڭىرگە ارنايى كوماندا جىبەرىلدى، دەپ حابارلايدى Kazinform ءتىلشىسى.
ۆەدومستۆونىڭ مالىمەتىنشە، 2025 -جىلعى 11-قازاندا قوستاناي - استانا باعىتىنداعى IQ368 تۇراقتى رەيسىن ورىنداۋ كەزىندە قوستاناي اۋەجايىندا اۋە كەمەسىندە تەحنيكالىق اقاۋ تىركەلىپ، ۇشۋ توقتاتىلعان. اۋە كومپانيا اقپاراتىنا سايكەس، كەيبىر جولاۋشى شاسسي ماڭىندا قىسقا مەرزىمدى وت ۇشقىنى بايقالعانىن حابارلاعان. بۇل دەرەك تەحنيكالىق تەكسەرىس كەزىندە نازارعا الىناتىن بولادى.
اتالعان وقيعا تۋرالى اقپارات جەرگىلىكتى ب ا ق-تا جاريالاندى.
- قوستانايعا اقاۋدى تەكسەرىپ، جويۋ ءۇشىن تەحنيكالىق كوماندا جىبەرىلدى. جولاۋشىلارعا قوناقۇيگە ورنالاستىرۋ، بيلەت قۇنىن قايتارۋ نەمەسە باسقا رەيستەرگە اۋىستىرۋ ۇسىنىلدى، - دەپ حابارلادى اۋە كومپانيانىڭ باسپا ءسوز قىزمەتى.
كومپانيا وكىلدەرى جولاۋشىلار مەن ەكيپاجدىڭ قاۋىپسىزدىگى - باستى باسىمدىق ەكەنىن، بارلىق ءىس-ارەكەتتىڭ حالىقارالىق ۇشۋ قاۋىپسىزدىگى ستاندارتتارىنا قاتاڭ سايكەستىكتە ورىندالاتىنىن اتاپ ءوتتى.
اتالعان وقيعاعا بايلانىستى قازاقستان رەسپۋبليكاسى كولىك مينيسترلىگى دە پىكىر ءبىلدىردى.
- Qazaq Air اۋە كومپانياسىنىڭ قوستاناي - استانا باعىتىنداعى رەيسى كەزىندە بولعان اۆياتسيالىق وقيعانى تەرگەۋ ءۇشىن ازاماتتىق جانە تاجىريبەلىك اۆياتسيا سالاسىنداعى اۆياتسيالىق وقيعالار مەن ينتسيدەنتتەردى ەسەپكە الۋ جانە تەرگەپ-تەكسەرۋ قاعيدالارىنا سايكەس كوميسسيا قۇرىلاتىن بولادى. تەرگەۋدى قر كولىك مينيسترلىگىنىڭ كولىك وقيعالارى مەن ينتسيدەنتتەرىن تەرگەۋ دەپارتامەنتى جۇرگىزەدى، - دەپ حابارلادى ۆەدومستۆو.
ايتا كەتەيىك، قازاقستاندا ەسكى ۇشاقتاردى، سونىڭ ىشىندە 1981 -جىلى ءوندىرىسى توقتاتىلعان ياك-40 ۇشاقتارىن پايدالانۋىن توقتاتۋ ۇسىنىلدى.
