قوسشىدا بالالار مىنگەن شاعىن اۆتوبۋس اپاتقا ۇشىرادى
استانا. KAZINFORM - شاعىن اۆتوبۋستا بولعان 10 بالانىڭ جەتەۋى استانا قالاسىنداعى اۋرۋحاناعا جەتكىزىلدى.
اقمولا وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جول اپاتى 2025-جىلدىڭ 9-ساۋىرىندە بولعان.
- تاڭەرتەڭگى ساعات 7 لەر شاماسىندا قوسشى قالالىق پوليتسيا بولىمىنە «لەسنايا پوليانا» تۇرعىن الابىنداعى 2-ءۇيدىڭ جانىندا جول-كولىك وقيعاسى بولعانى تۋرالى اقپارات كەلىپ ءتۇستى. الدىن الا مالىمەت بويىنشا، وندا جاس بالالار زارداپ شەككەن بولۋى مۇمكىن. پوليتسيا قىزمەتكەرلەرى دەرەۋ وقيعا ورنىنا شىقتى، - دەپ حابارلادى ۆەدومستۆو.
الدىن الا مالىمەت بويىنشا، جەرگىلىكتى دۇكەندەردىڭ ءبىرىنىڭ جانىندا «يۆەكو» اۆتوبۋسى مەن «تويوتا» شاعىن اۆتوبۋسى سوقتىعىسقان. «تويوتا» شاعىن اۆتوبۋسى ينەرتسيامەن اۆتوبۋس پاۆيلونىنا سوعىلعان. شاعىن اۆتوبۋستا بالاباقشاعا شىققان بارلىعى 10 بالا بولدى. پوليتسيانىڭ مالىمەتىنشە، ولاردىڭ جەتەۋى تەكسەرۋ ءۇشىن استاناداعى اۋرۋحاناعا جەتكىزىلگەن.
- وقيعا ورنىندا اپاتتىڭ ناقتى ءمان-جايىن جانە كىنالىلەردى انىقتاۋ ءۇشىن بارلىق قاجەتتى شارا قابىلدانىپ جاتىر، - دەپ قوستى ۆەدومستۆو.
بارلىق بالا مامانداردىڭ كەشەندى تەكسەرۋىنەن، سونىمەن قاتار رەنتگەن، توموگرافيا جانە ۋدز ءوتتى.
استانا قالالىق قوعامدىق دەنساۋلىق ساقتاۋ باسقارماسىنىڭ حابارلاۋىنشا، قوسشى قالاسىنداعى «لەسنايا پوليانا» تۇرعىن الابىندا «اڭىز» دۇكەنىنە قاراما-قارسى جەردە بولعان جول-كولىك وقيعاسى سالدارىنان بەس بالا 2-قالالىق كوپسالالى بالالار اۋرۋحاناسىنا جەتكىزىلدى. بارلىق ناۋقاس كەشەندى تەكسەرۋدەن ءوتتى، ونىڭ ىشىندە كەزەكشى ماماندار: رەانيماتولوگ، نەيروحيرۋرگ، تراۆماتولوگ جانە حيرۋرگ تەكسەرۋىنەن ءوتتى.
- مەديتسينالىق تەكسەرۋدىڭ قورىتىندىسى بويىنشا ءتورت بالاعا قاجەتتى كومەك كورسەتىلىپ، امبۋلاتورلىق ەمدەۋگە جىبەرىلدى. ءبىر بالا ودان ءارى باقىلاۋ ءۇشىن جانساقتاۋ بولىمىنە جاتقىزىلدى، - دەپ حابارلادى ۆەدومستۆو.
دارىگەرلەر زارداپ شەككەندەردىڭ جاعدايىن باقىلاۋدى جالعاستىرىپ جاتىر.
قوسشى قالاسىنا جاڭا اكىم تاعايىندالعانىن جازعان بولاتىنبىز.
