قوسشىعا دەيىنگى LRT جەلىسى قاشان اياقتالادى
استانا. قازاقپارات - «City Transportation Systems» كومپانياسىنىڭ باسقارما ءتوراعاسى اسىلبەك دۇيسەبايەۆ قوسشى باعىتىنا تارتىلاتىن LRT جەلىسىنىڭ ەكىنشى كەزەڭىنىڭ قۇرىلىسى 2027-جىلى اياقتالۋى مۇمكىن ەكەنىن ايتتى.
ونىڭ سوزىنشە، قۇرىلىس قارقىنى جوبانىڭ قارجىلاندىرىلۋىنا بايلانىستى بولماق.
- تەحنيكالىق تۇرعىدان العاندا، جوبانى كەلەسى جىلدىڭ سوڭىنا دەيىن اياقتاۋعا مۇمكىندىك بار. الايدا ءبارى قارجىلاندىرۋ ماسەلەسىنە بايلانىستى. قازىر ءبىز قارجى ۇيىمدارىمەن وسى جوبا بويىنشا بەلسەندى كەلىسسوز جۇرگىزىپ جاتىرمىز. قىزىعۋشىلىق جوعارى، سوندىقتان بۇل ماسەلە وڭ شەشىمىن تابادى دەپ ويلايمىن، - دەدى ول باسپا ءسوز ءماسليحاتىندا.
CTS باسشىسىنىڭ ايتۋىنشا، جوبانى LRT- نىڭ ءبىرىنشى كەزەڭىن سالعان قىتايلىق كومپانيا جۇزەگە اسىرادى. قارجىلاندىرۋ ماسەلەسى تولىق شەشىلگەنگە دەيىن مەردىگەر ەكىنشى جەلىنىڭ قۇرىلىسىن ءوز قاراجاتى ەسەبىنەن جۇرگىزەدى.
سونىمەن قاتار ول قوسشى باعىتىنا تارتىلاتىن جەلىنىڭ ناقتى قۇنى ازىرگە بەلگىسىز ەكەنىن ايتتى.
- ازىرگە قوسشى باعىتى بويىنشا تەحنيكالىق ساراپتاما عانا دايىن. جاقىن ۋاقىتتا بارلىق مالىمەت ناقتىلانادى، - دەدى اسىلبەك دۇيسەبايەۆ.
ونىڭ ايتۋىنشا، جاڭا جەلىدە قازىرگى باعىتتاعىداي LRT پويىزدارى قاتىنايدى. الايدا ۆاگونداردىڭ ديزاينى وزگەرۋى مۇمكىن.
بۇعان دەيىن LRT قۇرىلىسىنىڭ كەلەسى كەزەڭى قوسشى قالاسى باعىتىنا جۇرگىزىلەتىنى حابارلانعان ەدى.
ايتا كەتەيىك، 12-مامىر كۇنى LRT ۆاگوندارى جۋرناليستەرگە تانىستىرىلدى.
ال جولاۋشىلار ءۇشىن جەلىنى 16-17-مامىردا اشۋ جوسپارلانىپ وتىر.
