قوسشىعا باراتىن LRT جەلىسىندە تىرەكتەردى ورناتۋ جۇمىستارى قانشا پايىزعا ورىندالدى
استانا. KAZINFORM - قوسشى قالاسىنا قاراي تارتىلاتىن LRT جەلىسىندە 294 تىرەك ورناتىلىپ، 385 ەستاكادا قۇرىلىمى مونتاجدالعان. بۇل تۋرالى استانا اكىمى جەڭىس قاسىمبەك مالىمدەدى.
ونىڭ ايتۋىنشا، LRT ىسكە قوسىلعالى بەرى جولاۋشىلار 11,5 ميلليونعا جۋىق ساپار جاساعان. قالا باسشىسى جاڭا كولىك ءتۇرى استانالىقتاردىڭ كۇندەلىكتى ءومىرىنىڭ ءبىر بولىگىنە اينالىپ كەلە جاتقانىن اتاپ ءوتتى.
قۇرىلىس قالاي ءجۇرىپ جاتىر؟
قوسشى قالاسى باعىتىندا تىرەكتەر، ەستاكادا كونسترۋكتسيالارى مەن ستانسيالار سالۋ جۇمىستارى جالعاسۋدا.
بۇگىنگە دەيىن قۇرىلىسشىلار 294 تىرەك ورناتقان. بۇل - جوسپارلانعان كولەمنىڭ 97 پايىزى. سونداي-اق 385 ەستاكادا كونسترۋكسياسى مونتاجدالعان، ياعني جالپى جۇمىستىڭ 73 پايىزى ورىندالعان.
2026-جىلدىڭ سوڭىنا دەيىن 401، 402 جانە 403-ستانسيالارداعى بەتونداۋ جۇمىستارىن اياقتاۋ جوسپارلانىپ وتىر.
تاعى سەگىز ستانسيا قايدا سالىنادى؟
LRT- نىڭ ەكىنشى باعىتى جاعالاۋ شاعىن اۋدانىنا قاراي تارتىلادى. مۇندا سەگىز ستانسيا سالۋ كوزدەلگەن.
گەولوگيالىق ىزدەستىرۋ جۇمىستارى اياقتالعان. قازىر جۇمىسشىلار قورشاۋلار ورناتىپ، ينجەنەرلىك جەلىلەردى كوشىرۋ جانە قايتا تارتۋ جۇمىستارىن جۇرگىزىپ جاتىر.
دايىندىق كەزەڭى اياقتالعاننان كەيىن نەگىزگى قۇرىلىس-مونتاج جۇمىستارى باستالادى.
وڭ جاعالاۋدا قانداي جۇمىستار اتقارىلىپ جاتىر؟
LRT- نىڭ تاعى ءبىر جەلىسىن «استانا-1» تەمىرجول ۆوكزالىنا قاراي تارتۋ جوسپارلانعان. بۇل باعىتتا 201-اۋىسىپ ءمىنۋ ستانسياسىن قوسا العاندا، توعىز ستانسيا قاراستىرىلعان.
اكىمنىڭ مالىمەتىنشە، گەولوگيالىق ىزدەستىرۋ جۇمىستارى اياقتالعان. قازىر سىعاناق كوشەسىنىڭ بويىندا، قابانباي باتىر جانە تۇران داڭعىلدارىنىڭ اراسىندا 201 جانە 301-ستانسيالاردى بايلانىستىراتىن اۋىسىپ ءمىنۋ تورابىنىڭ قۇرىلىسى جالعاسىپ جاتىر.
قازاق راديوسى كوشەسى مەن قابانباي باتىر داڭعىلى اراسىنداعى ۋچاسكەدە ەكى تىرەك بەتوندالعان. سونىمەن قاتار قادالار مەن تىرەكتەردىڭ نەگىزى بولاتىن روستۆەركتەردى ورناتۋ جۇمىستارى جۇرگىزىلۋدە.
قالعان ۋچاسكەلەردە قۇرىلىسشىلار جۇمىستىڭ كەلەسى كەزەڭىنە دايىندالىپ جاتىر.
LRT جەلىسى قالاي داميدى؟
جوبانىڭ ەكىنشى كەزەڭى اياسىندا جەلىنى بىردەن ءۇش باعىتتا كەڭەيتۋ كوزدەلگەن. تىرەكتەر مەن ەستاكادا كونسترۋكسيالارىنىڭ قۇرىلىسقا دايىندىق دەڭگەيى بويىنشا قوسشى باعىتىنداعى ۋچاسكە الدا كەلەدى.
