قورىلدى ەمدەۋگە بولا ما؟

جالپى مامانداردىڭ ايتۋىنشا، قورىلداعاننىڭ زيانى جوق. شارشاعان ادامنىڭ قورىلداپ ۇيىقتاۋى قالىپتى دەسەدى.

الايدا ءجيى قورىلداۋ، قاتتى قورىلداۋ سىندى بەلگىلەرى اۋرۋدان حابار بەرۋى مۇمكىن.

قورىل نەسىمەن قاۋىپتى؟

ادەتتە، قورىلداۋدىڭ ادامعا زيانى جوق، تەك ول ونىڭ اينالاسىنداعى ادامدارعا ۇيىقتاۋعا كەدەرگى كەلتىرەدى. الايدا كەي جاعدايدا قورىل وبسترۋكتيۆتى اپنوە سيندرومى دەپ اتالاتىن قاۋىپتى كۇيدىڭ بەلگىسى بولۋى مۇمكىن. بۇل بۇزىلىس ادام تىنىسىنىڭ تولىقتاي نەمەسە ءىشىنارا توقتاپ قالۋىنا اكەلەدى.

پاتولوگيانىڭ مىناداي سالدارلارى بولۋى مۇمكىن:

كۇندىزگى ۇيقىشىلدىق؛

جوعارى قان قىسىمى؛

ينسۋلت؛

II ءتيپتى ديابەت؛

جۇرەك اۋرۋىنىڭ دامۋى؛

زەيىن قويۋدىڭ ناشارلاۋى؛

دەپرەسسيا جانە كوڭىل كۇيدىڭ قۇبىلمالدىلىعى؛

كورۋگە بايلانىستى پروبلەما.

ادەتتە، اپنوەنىڭ العاشقى بەلگىلەرىن ونىڭ تۋىستارى بايقايدى. ەگەر جاقىندارىڭىز، ءسىز ۇيىقتاپ جاتىپ قاتتى قورىلدايتىنىڭىزدى جانە ول ءالسىن-ءالسىن تىنىشتالىپ قالاتىنىن ايتسا، دارىگەرگە كورىنگەن ءجون.

قورىلدى ەمدەۋگە بولا ما؟

كەي جاعدايدا ادام قورىلداۋىن وزدىگىنەن ازايتا الادى.

ءومىر ءسۇرۋ سالتىڭىزدى وزگەرتۋ

ادەتتە، ارتىق سالماعى بار ادامدار ءجيى قورىلدايدى. سوندىقتان ءبىرىنشى كەزەكتە ارتىق سالماقتان ارىلعان ءجون. بۇل از قورىلداۋىڭىزعا كومەكتەسەدى.

جاستىقتى اۋىستىرۋ

بەلگىلەردىڭ قارقىندىلىعىن ازايتۋ ءۇشىن سىنا ءتارىزدى جاستىق العان دۇرىس. ال بيىك جاستىقتاردان باس تارتىڭىز. سەبەبى ول مويىنعا جانە ارقاعا تۇسەتىن كۇشتى ارتتىرادى.

ارنايى ديەۆايستاردى بايقاپ كورۋ

قازىر قورىلدان ارىلتاتىن ارنايى ديەۆايستار كوپ. مىسالى، مۇرىن قۋىسىن كەڭەيتكىشتەر. ولار ۇيقى كەزىندە جەڭىل دەمالۋعا كومەكتەسەدى. الايدا كەز كەلگەن قۇرالدار پروبلەمانى تەك ۋاقىتشا شەشەدى.

وتا كومەگىنە جۇگىنۋ

حيرۋرگيالىق ارالاسۋ قورىلدى تۋدىراتىن مەحانيكالىق كەدەرگىنى كەتىرەدى. الايدا مۇنداي ەمگە قارسى كورسەتىلىم بار. مىسالى، قارت كىسىلەرگە، ارتىق سالماعى بار جانە اپنوەنىڭ اۋىر تۇرىمەن قينالاتىن ادامدارعا وتا جاسالمايدى.