قورلار قارجىنىڭ قايدا جۇمسالعانى تۋرالى ەسەپ بەرۋگە مىندەتتى
استانا. KAZINFORM - ەلىمىزدە قورلاردىڭ قىزمەتى «قايىرىمدىلىق تۋرالى» جانە «كوممەرتسيالىق ەمەس ۇيىمدار تۋرالى» زاڭمەن رەتتەلەدى. وسى زاڭنامالىق نەگىزگە ساي، قور رەتىندە تىركەلگەن ءار كوممەرتسيالىق ەمەس ۇيىم ءوز قىزمەتى تۋرالى، ونىڭ ىشىندە قارجىنىڭ جۇمسالۋ باعىتتارى تۋرالى مالىمەتتەردى ۋاكىلەتتى ورگانعا ۇسىنۋى ءتيىس.
«كوممەرتسيالىق ەمەس ۇيىمدار تۋرالى» زاڭنىڭ 13-بابىنا ساي، قورلار قۇرىلتايشىلاردىڭ قۇرامىنا، سونداي-اق قىزمەت سالاسىنا قاراي جەكە، كورپوراتيۆتىك، قوعامدىق، مەملەكەتتىك بولىپ قۇرىلۋى مۇمكىن.
ال قىزمەت ماقساتتارىنا قاراي الەۋمەتتىك، قايىرىمدىلىق، مادەني، ءبىلىم قورلارى جانە وزگە دە قورلار بولىپ قۇرىلادى.
قازاقستان رەسپۋبليكاسى نورماتيۆتىك قۇقىقتىق اكتىلەرىنىڭ اقپاراتتىق-قۇقىقتىق جۇيەسىندە كورسەتىلگەندەي، كوممەرتسيالىق ەمەس ۇيىمنىڭ جارعىسى مىنالاردى قامتۋى كەرەك:
1) كوممەرتسيالىق ەمەس ۇيىمنىڭ اتاۋىن، سونىڭ ىشىندە ۇيىمدىق-قۇقىقتىق نىسانىن، قىزمەتىنىڭ ءمانى مەن ماقساتىن؛
2) كوممەرتسيالىق ەمەس ۇيىمنىڭ ورنالاسقان جەرىن؛
3) كوممەرتسيالىق ەمەس ۇيىمنىڭ باسقارۋ ورگاندارىنىڭ قۇرىلىمىن، قالىپتاستىرۋ ءتارتىبىن جانە قۇزىرەتىن؛
4) كوممەرتسيالىق ەمەس ۇيىم مۇشەلەرىنىڭ (قاتىسۋشىلارىنىڭ) قۇقىقتارى مەن مىندەتتەرىن؛
5) كوممەرتسيالىق ەمەس ۇيىمنىڭ مۇشەلىگىنە (ەگەر كوممەرتسيالىق ەمەس ۇيىمنىڭ مۇشەلىگى بولعان جاعدايدا) قابىلداۋ جانە ودان شىعۋ شارتى مەن ءتارتىبىن؛
6) كوممەرتسيالىق ەمەس ۇيىمنىڭ مۇلكىن قۇراۋ كوزدەرىن؛
7) كوممەرتسيالىق ەمەس ۇيىمنىڭ قۇرىلتاي قۇجاتتارىنا وزگەرىستەر مەن تولىقتىرۋلار ەنگىزۋ ءتارتىبىن؛
8) كوممەرتسيالىق ەمەس ۇيىمدى قايتا ۇيىمداستىرۋ جانە ونىڭ قىزمەتىن توقتاتۋ شارتىن؛
9) كوممەرتسيالىق ەمەس ۇيىم تاراتىلعان جاعدايدا ونىڭ مۇلكىن پايدالانۋ ءتارتىبىن؛
10) فيليالدار مەن وكىلدىكتەر تۋرالى مالىمەتتەردى.
«كوممەرتسيالىق ەمەس ۇيىمدار تۋرالى» زاڭنىڭ 41-بابى 5-تارماعىنا سايكەس، قوعامدىق، كورپوراتيۆتىك جانە جەكەشە قورلار ءوز قىزمەتى تۋرالى، ونىڭ ىشىندە ءوزىنىڭ قۇرىلتايشىلارى، مۇلكىنىڭ قۇرامى، اقشانىڭ قالىپتاسۋ كوزدەرى جانە جۇمسالۋ باعىتتارى تۋرالى مالىمەتتەردى جىل سايىن 31-ناۋرىزعا دەيىن ۇكىمەتتىك ەمەس ۇيىمدارمەن ءوزارا ءىس-قيمىل سالاسىنداعى ۋاكىلەتتى ورگانعا ۇسىنادى.
ادىلەت مينيسترلىگى - قوعامدىق بىرلەستىكتەردى تىركەۋ قىزمەتىن اتقاراتىن ورگان.
اۆتور
ەربول جانات
