قورعانىس مينيسترلىگىنىڭ 104 نىسانى تەكسەرىلىپ، 37 ءىس قارالىپ جاتىر
استانا. KAZINFORM - قورعانىس مينيسترلىگىنىڭ قىزمەتىن كەشەندى تەكسەرۋ جونىندەگى كوميسسيا ارالىق قورىتىندىلاردى ۇسىندى. بۇل تۋرالى اقوردانىڭ باسپا ءسوز قىزمەتى حابارلادى.
مەملەكەت باسشىسى قۇرعان كوميسسيا قازاقستان رەسپۋبليكاسى قورعانىس مينيسترلىگىنىڭ قىزمەتىن كەشەندى تەكسەرۋدىڭ ارالىق قورىتىندىلارىن ۇسىندى.
تەكسەرۋ قورعانىس ۆەدومستۆوسىنىڭ 104 نىسانىن قامتىدى. بيۋدجەت قاراجاتىن پايدالانۋ تيىمدىلىگىنە اۋديت جۇرگىزۋ جالعاسىپ جاتىر.
كوميسسيا جۇمىسى اياسىندا قاۋىپسىزدىكتى قامتاماسىز ەتۋگە، اسكەري قىزمەت وتكەرۋگە ءتيىستى جاعداي جاساۋعا، ازىق-تۇلىكپەن جانە كيىم-كەشەكپەن جابدىقتاۋدىڭ، مەديتسينالىق كومەك كورسەتۋدىڭ ساپاسىنا، سونداي-اق مەملەكەتتىك مۇلىكتىڭ ساقتالۋىنا باسا نازار اۋدارىلىپ وتىر.
انىقتالعان جەكەلەگەن قۇقىق بۇزۋ دەرەكتەرى بويىنشا سوتقا دەيىنگى تەرگەپ- تەكسەرۋ باستالدى.
قازىرگى ۋاقىتتا قىلمىستىق قۋدالاۋ ورگاندارىنىڭ قاراۋىندا 37 ءىس بار. تەرگەۋ مۇددەسىنە بايلانىستى بۇل ىستەر جونىندەگى مالىمەتتەر ازىرگە جاريا ەتىلمەيدى.
تەكسەرۋ «زاڭ جانە ءتارتىپ» قاعيداتى نەگىزىندە جۇرگىزىلۋدە. ونىڭ ماقساتى - قارۋلى كۇشتەردىڭ جاۋىنگەرلىك ازىرلىگىن قامتاماسىز ەتۋ جانە اسكەري ءتارتىپتى نىعايتۋ ءۇشىن جۇيەلى شارالار ازىرلەۋ.
كوميسسيانىڭ ۇسىنىمدارى اسكەري رەفورما جوسپارىن ىسكە اسىرۋ بارىسىندا دا پايدالانىلىپ وتىر.
كوميسسيا جۇمىسى بيىلعى قاراشادا اياقتالادى.
ايتا كەتەلىك ماڭعىستاۋداعى قايعىلى وقيعاعا بايلانىستى 300 دەن استام ادامنان جاۋاپ الىنعانى تۋرالى جازعان ەدىك.
