قورعانىس ءمينيسترى قارۋلى كۇشتەردى جاڭعىرتۋ جوسپارى تۋرالى باياندادى
استانا. KAZINFORM - قورعانىس ءمينيسترى ايدوس مىرزاحمەتوۆ پرەزيدەنت قاسىم-جومارت توقايەۆقا قارۋلى كۇشتەردى جاڭعىرتۋ جوسپارى تۋرالى باياندادى.
اقوردانىڭ باسپا ءسوز قىزمەتىنىڭ حابارلاۋىنشا، قارۋلى كۇشتەردىڭ جاڭا اقپاراتتىق-كوممۋنيكاتسيالىق ستراتەگياسىن قابىلداۋ، سونداي-اق كونستيتۋتسياداعى «زاڭ مەن ءتارتىپ» قاعيداتىنا ساي تاربيە جۇمىستارىنىڭ ساپاسىن ارتتىرۋ رەفورمانىڭ ماڭىزدى باعىتتارىنىڭ ءبىرى بولماق.
- اتالعان شارالار اسكەر قاتارىنداعى ءتارتىپ پەن قوعامنىڭ ارمياعا دەگەن سەنىمىن نىعايتۋعا باعىتتالعان. جوسپاردا كوزدەلگەن ۇيىمداستىرۋ شارالارى وسى جىلدىڭ سوڭىنا دەيىن، ال نەگىزگى تۇجىرىمدامالىق شارالار كەلەسى جىلى ىسكە اسىرىلادى، - دەلىنگەن حابارلامادا.
جيىن بارىسىندا قاۋىپسىزدىك كەڭەسىنىڭ ءتوراعاسى قورعانىس مينيسترلىگىنىڭ قىزمەتىن كەشەندى تەكسەرۋ جونىندەگى كوميسسيانىڭ جۇمىسىن جىل سوڭىنا دەيىن اياقتاۋدى تاپسىردى.
پرەزيدەنت اسكەري قاۋىپسىزدىك بۇكىل مەملەكەتكە ورتاق مىندەت ەكەنىن، سوندىقتان بارلىق مۇددەلى ورگاننان ۇيلەسىمدى جۇمىس ىستەۋ تالاپ ەتىلەتىنىن ەسكەرتتى.
وتىرىس قورىتىندىسى بويىنشا اسكەري رەفورما جوسپارى ماقۇلداندى.
مەملەكەت باسشىسى جوسپارلانعان وزگەرىستەردى ۋاقتىلى ءارى تولىق جۇزەگە اسىرۋ وتە ماڭىزدى ەكەنىن اتاپ ءوتتى.
جوسپاردىڭ ورىندالۋىن ۇيلەستىرۋ مىندەتى ۇكىمەت پەن قاۋىپسىزدىك كەڭەسىنە جۇكتەلەدى.
ەسكە سالايىق، مۇنىڭ الدىندا پرەزيدەنت قاسىم-جومارت توقايەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ وتىرىسى وتكەنىن جازعان ەدىك.
