قورعاستا قىتاي ازاماتتارى ۇيىمداستىرعان زاڭسىز ويىن بيزنەسى مەن جەزوكشەلەر وشاعى انىقتالدى
استانا. KAZINFORM - «قورعاس» ش ى ح و اۋماعىنىڭ قازاقستان جاعىندا 6 زاڭسىز ويىن بيزنەسىن جانە ءبىر جەزوكشەلەر وشاعىن ق ح ر ازاماتتارى ۇيىمداستىرعان.
اتالعان ورىنداردى ق م ا جەتىسۋ وبلىسى بويىنشا دەپارتامەنتى وبلىستىق پروكۋراتۋراسى، ۇلتتىق قاۋىپسىزدىك دەپارتامەنتى سونداي- اق وبلىستىق پوليتسيا ءارى شەكارا قىزمەتىمەن بىرلەسە وتىرىپ جويدى. بۇل تۋرالى قارجىلىق مونيتورينگ اگەنتتىگىنىڭ باسپا ءسوز قىزمەتى ءمالىم ەتتى.
انىقتالعانداي، استىرتىن ويىن مەكەمەلەرى تۇنگى ۋاقىتتا شەكتەۋلى ادامدار ءۇشىن، اتاپ ايتقاندا قىتاي ازاماتتارى ءۇشىن عانا جۇمىس ىستەگەن.
«ءتىنتۋ ناتيجەسىندە 4 كوممەرتسيالىق عيماراتتا 76 ويىن اۆتوماتى، 43 ويىن ۇستەلى، قۇمار ويىندارىن ۇيىمداستىرۋعا قاجەتتى كوپتەگەن تەحنيكالىق قۇرال-جابدىقتار، سونداي-اق 60 مىڭ يۋاننان استام اقشالاي قاراجات تابىلىپ تاركىلەندى» - دەلىنگەن حابارلامادا.
سوتقا دەيىنگى تەرگەۋ جالعاسىپ جاتىر. ق ر ق پ ك 201-بابىنا سايكەس، تەرگەۋ مۇددەسىندەگى وزگە دە مالىمەتتەر تاراتىلۋعا جاتپايدى.
ق ر كونستيتۋتسياسىنىڭ 77-بابىنىڭ 3-تارماعىنىڭ 1-تارماقشاسىنا جانە ق ر قىلمىستىق- پروتسەستىك كودەكسىنىڭ 19-بابىنىڭ 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن اركىم كىناسىز دەپ ەسەپتەلەدى.
اۆتور
باقىتگۇل اباي قىزى
