قورعاسقا كەلۋشىلەر سانى 1,8 ميلليونعا جەتتى
استانا. KAZINFORM - سوڭعى جىلداردا «قورعاس» ش ى ح و- دا ينفراقۇرىلىمدى سيفرلاندىرۋ، اۆتوماتتاندىرۋ جانە جاڭعىرتۋدىڭ كەشەندى ءىس-شارالارى جۇزەگە اسىرىلىپ جاتىر.
سونىڭ ناتيجەسىندە اتالعان ورتالىق تۋريزمدى، ساۋدا مەن ينۆەستيتسيانى دامىتۋعا باعىتتالعان زاماناۋي ينفراقۇرىلىمى بار ءتيىمدى الاڭعا اينالدى. بۇل تۋرالى جەتىسۋ وبلىسى اكىمىنىڭ باسپا ءسوز قىزمەتى ءمالىم ەتتى.
«قورعاس» ش ى ح و باسقارما ءتوراعاسىنىڭ ورىنباسارى سەيىلبەك سادىربەكتىڭ ايتۋىنشا، مۇندا بارلىق باسقارۋ جانە وتكىزۋ جۇمىستارى تولىق سيفرلاندىرىلىپ، Face ID جۇيەسى ەنگىزىلگەن.
- «قورعاس» ش ى ح و- نىڭ باستى عيماراتىنا كۇردەلى جوندەۋ جۇمىسى جۇرگىزىلىپ، وعان كىرۋدەن باستاپ، تاۋاردى بەرۋگە دەيىنگى پروتسەستىڭ ءبارى تولىق سيفرلاندىرىلدى. QR كود ارقىلى ونلاين بيلەت الۋ مۇمكىندىگى جاسالدى. وسىنىڭ ناتيجەسىندە ورتالىقتىڭ وتكىزۋ قابىلەتى ايتارلىقتاي ءوستى. مىسالى، 2024-جىلمەن سالىستىرعاندا بىلتىر كەلۋشىلەر سانى 16 پايىزعا ارتتى. بۇعان دەيىن ءبىز 4-5 مىڭ ادام عانا قابىلداساق، قازىر 9 مىڭ ادامعا دەيىن قابىلداۋ مۇمكىندىگىمىز بار. بيىل بۇدان دا كوپ تۋريست كەلەدى دەپ كۇتۋدەمىز، - دەيدى س. سادىربەك.
سونىمەن قاتار ەكىنشى باگاج تەرمينالى، جۇك تاسىمالداۋ بويىنشا «قازپوشتا» سەرۆيسى ىسكە قوسىلدى. سونىڭ ارقاسىندا تاۋار تاسىمالداۋ جەڭىلدەگەن. ماسەلەن، بۇعان دەيىن تاۋار تاسىمالى 4-5 ساعاتقا سوزىلسا، سيفرلاندىرۋدىڭ ارقاسىندا بۇل جۇمىس 1-1,5 ساعاتتا اتقارىلاتىن بولدى.
ءوز كەزەگىندە تۇرعىندار قازىر بەكەتتە كەپتەلىس ازايىپ، جۇمىس ەداۋىر جەڭىلدەگەنىن ايتادى. ماسەلەن، جاركەنت قالاسىنىڭ تۇرعىنى ليليا جۇماحانوۆا:
- جۇمىسىما بايلانىستى كۇندەلىكتى بەكەت ارقىلى وتەمىن. ءار كەلگەن سايىن وڭ وزگەرىستەردى بايقايمىن. بۇرىن بەكەتتەگى ۇزىن- سونار كەزەك سىرتقا دەيىن سوزىلاتىن. قازىر بۇرىنعىداي ەمەس، سيفرلاندىرۋ ارقىلى كەزەك ءبىر ىزگە قويىلدى، عيماراتتىڭ ءىشى كەڭەيىپ، جاڭارتىلدى، - دەدى ول.
جاركەنت قالاسىنىڭ تاعى ءبىر تۇرعىنى ماديار قۇرمانبايەۆ:
- بۇرىن ءبىز بيلەت الۋ ءۇشىن بەكەتكە ارنايى كەلىپ، كەزەككە تۇراتىنبىز. ول تۇرعىندارعا ايتارلىقتاي قيىندىق تۋعىزاتىن. قازىر سيفرلاندىرۋدىڭ ارقاسىندا بيلەتتى ءتۇرلى بانك جەلىلەرى ارقىلى ونلاين الىپ، بەكەتتەن وڭاي وتەتىن بولدىق، - دەيدى.
قابىلدانعان شارالاردىڭ ناتيجەسىندە ورتالىققا كەلۋشىلەر سانى 2023-جىلى 966,9 مىڭ بولسا، بۇل كورسەتكىش 2025-جىلى 1,8 ميلليون ادامعا جەتتى.
ءسويتىپ، «قورعاس» ش ى ح و ينفراقۇرىلىم مەن سيفرلىق سەرۆيستى، تۋريزم مەن ەلارالىق ساۋدا-ساتتىقتى دامىتۋعا ىقپال ەتىپ وتىر.
