قورعاس كەدەن بەكەتى اۆتوكولىك ەكسپورتىنان رەكوردتىق كورسەتكىشكە قول جەتكىزدى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى
وزبەكستان مەن قازاقستان اۋىل شارۋاشىلىعى سالاسىنداعى ىنتىماقتاستىق كەڭەيەدى - ءوزا
وزبەكستان رەسپۋبليكاسىنىڭ اۋىل شارۋاشىلىعى ءمينيسترى يبروحيم ابدۋراحمونوۆ قازاقستان رەسپۋبليكاسىنىڭ وزبەكستانداعى توتەنشە جانە وكىلەتتى ەلشىسى بەيبىت اتامقۇلوۆپەن كەزدەسۋ وتكىزدى.
بۇل تۋرالى «ءوز ا» اقپارات اگەنتتىگى مالىمدەدى.
حابارلامادا ايتىلۋىنشا، كەزدەسۋدە ەكى باۋىرلاس ەل اراسىنداعى وداقتاستىق قاتىناستاردى ودان ءارى نىعايتۋ، اۋىل شارۋاشىلىعى سالاسىنداعى ىنتىماقتاستىقتى كەڭەيتۋ جانە بۇرىن جۇزەگە اسىرىلعان جوبالاردى جەدەلدەتۋ مۇمكىندىكتەرى تالقىلاندى.
اڭگىمەلەسۋ بارىسىندا ەكىجاقتى قارىم-قاتىناستاردىڭ دامۋىندا بەلگىلى ءبىر جەتىستىكتەرگە قول جەتكىزىلگەنىمەن، ءىس جۇزىندەگى ىنتىماقتاستىقتى كەڭەيتۋ ءۇشىن ءالى دە ۇلكەن مۇمكىندىكتەر بار ەكەنى اتاپ ءوتىلدى. سونداي-اق اۋىل شارۋاشىلىعى سالاسىنداعى كەلىسىمدەردى جۇزەگە اسىرۋ، عىلىمدى دامىتۋ جانە جاڭا جوبالاردى باستاۋ ماسەلەلەرى بويىنشا پىكىر الماسىلدى.
«كەزدەسۋدە اگرارلىق سالاداعى ارىپتەستىكتى جاڭا دەڭگەيگە كوتەرۋ، اتاپ ايتقاندا، استىق ونىمدەرى مەن مال شارۋاشىلىعىن دامىتۋ، سونداي-اق ەكى ەلدىڭ اۋىل شارۋاشىلىعى ماماندارىنىڭ تاجىريبە الماسۋ مۇمكىندىكتەرى تالقىلاندى»، دەپ جازادى «ءوز ا».
سونداي-اق وسى اپتادا «ءوز ا»-دا «قازاق ۇلتتىق ونەر ۋنيۆەرسيتەتىنىڭ ماگيسترانتتارى وزبەكستاندا بىلىكتىلىگىن ارتتىردى» دەگەن تاقىرىپتاعى اقپارات جاريالاندى.
اتالعان اقپارات كوزىنىڭ دەرەگىنشە، قازاقستان رەسپۋبليكاسى قازاق ۇلتتىق ونەر ۋنيۆەرسيتەتىنىڭ ماگيسترانتتارى كاموليددين بەحزود اتىنداعى ۇلتتىق بەينەلەۋ ونەرى جانە ديزاين ينستيتۋتىنىڭ «ونەر تاريحى جانە تەورياسى» جانە «مونۋمەنتالدى كەسكىندەمە» كافەدرالارىندا بىلىكتىلىگىن ارتتىرۋ باعدارلاماسىنا قاتىستى.
ماگيسترانتتار تاعىلىمداما بارىسىندا ينستيتۋتتاعى عىلىمي-زەرتتەۋ ورتاسىمەن، پروفەسسور- وقىتۋشىلار قۇرامىنىڭ تاجىريبەسىمەن، سونداي-اق ونەر سالاسىنداعى زاماناۋي ادىستەر مەن وقۋ ۇدەرىسىندەگى يننوۆاتسيالىق تەحنولوگيالاردىڭ قولدانىلۋىمەن جاقىن تانىسۋ مۇمكىندىگىنە يە بولدى.
«تاعىلىمدامانى ءساتتى اياقتاعانى ءۇشىن قازاق ۇلتتىق ونەر ۋنيۆەرسيتەتىنىڭ ماگيسترانتتارى باقىت جۇرايەۆ، سەرجان كامۋنوۆ، ەلەنا مارەيەۆا، جانەليا تاسقىنبايەۆا جانە نازەركە شىناربەك ارنايى سەرتيفيكاتتارمەن ماراپاتتالدى»، دەپ جازادى وزبەكستاندىق ب ا ق.
قىتايدا قانداسىمىز جەڭىل اتلەتيكادان ءبىر اپتادا ەكى رەت باس جۇلدە جەڭىپ الدى - CNR
قىتايدا تۇراتىن قانداسىمىز دينا نۇرلان قىزى جەڭىل اتلەتيكادان جابىق كەشەندەگى قىتاي چەمپيوناتىندا بيىكتىككە سەكىرۋ جارىسىنان باس جۇلدەنى قانجىعالادى. بۇل تۋرالى قىتايدىڭ «ورتالىق حالىق راديوسى» حابارلادى.
اتالعان ب ا ق-تىڭ دەرەگىنشە، جەڭىل اتلەتيكادان جابىق كەشەندەگى ايەلدەر اراسىنداعى بيىكتىككە سەكىرۋ جارىسىندا دينا نۇرلان قىزى 1.87 مەترلىك ناتيجەمەن باس جۇلدەنى قانجىعالادى. ول وسىدان ءبىر اپتا بۇرىن جەڭىل اتلەتيكادان جابىق كەشەندە وتكەن ۇلتتىق گران- پري جارىسىندا دا 1.87 مەترلىك كورسەتكىشپەن چەمپيون اتانعان بولاتىن.
دينا نۇرلان قىزى 1,90 مەتردى باعىندىرا الاتىنىنا سەنىمدى. ول جاتتىعۋدا 1,90 مەتردەن اسىپ كەتكەنىن جانە كەلەسى جارىستاردا ءوزىنىڭ وسى مەجەنى باعىندىرۋعا تىرىساتىنىن ايتقان.
ايتا كەتەيىك، دينا نۇرلان قىزى 1998 -جىلى قىتايدىڭ قۇلجا اۋدانىنىڭ ويمانبۇلاق اۋىلىندا دۇنيەگە كەلگەن. 15 جاسىندا شىڭجاڭ قۇراماسىنا قابىلدانعان. ول 2021 -جىلعى جەڭىل اتلەتيكادان ۇلتتىق چەمپيوناتتا بيىكتىككە سەكىرۋدەن 1,84 مەتر كورسەتكىشىمەن ەكىنشى ورىندى جەڭىپ السا، 2023 -جىلعى جەڭىل اتلەتيكادان ەل چەمپيوناتىندا باس جۇلدەنى ەنشىلەگەن. دينا نۇرلان قىزىنىڭ بويىنىڭ بيىكتىگى 1,87 مەتر. ول شىڭجاڭداعى بيىكتىككە سەكىرۋ سپورتشىلارى اراسىنداعى ەرەكشە تالانت يەسى.
قورعاس اۆتوكولىك ەكسپورتىنان رەكوردتىق كورسەتكىشكە قول جەتكىزدى - «جەنمين جيباو»
بىلتىر قورعاس قۇرلىقتىق شەكارا بەكەتىنەن 420 مىڭ اۆتوكولىك ەكسپورت ەتىلىپ، تاريحتاعى ەڭ جوعارى رەكوردتى جاڭارتتى، دەپ حابارلايدى قىتايدىڭ «جەنمين جيباو» باسىلىمى.
اتالعان ب ا ق-تىڭ دەرەگىنە سۇيەنسەك، مەملەكەت بويىنشا اۆتوكولىك ەكسپورت ەتەتىن ەڭ ۇلكەن قۇرلىقتىق وتكەلى رەتىندە قورعاس شەكارا بەكەتىنىڭ اۆتوكولىك ەكسپورتى جوعارى كورسەتكىشكە قول جەتكىزگەن. اتاپ ايتقاندا، 2024 -جىلى اتالعان كەدەن بەكەتتىڭ ەكسپورت ەتىلگەن اۆتوكولىك 421 مىڭ بولىپ، بۇرىنعى سايكەس مەزگىلدەگىدەن %38.6 ارتىپ، تاريحتاعى ەڭ جوعارى رەكوردتى جاراتتى.
«جەنمين جيباودىڭ» مالىمەتىنشە، قازىرگى ۋاقىتتا دا قورعاستا ەكسپورت ەتۋدى كۇتىپ تۇرعان اۆتوكولىكتەر كوپ ەكەنى ايتىلادى.
ايتا كەتەيىك، مۇندا جولاۋشىلار اۆتوكولىكتەرى، جۇكتى ءوزى تۇسىرەتىن اۆتوكولىكتەر جانە جاڭا ەنەرگيالى شاعىن اۆتوكولىك قاتارلىلارى بار.
قورعاس حاوچىن حالىقارالىق جۇك تاسىمالى كومپانياسىنىڭ ديرەكتورىنىڭ ايتۋىنشا، بيىل كومپانيانىڭ ەكسپورتى ارتقان. قىتايداعى كوپتەگەن تاۋار اۆتوكولىكتەرىن وندىرەتىن زاۆودتاردان ۋاكىلدىك مىندەت وتەۋ ۇقىعىن الىپ، شەتەلدە بىرنەشە قىزمەت وتەۋ پۋنكتىن كوبەيتكەن. سول ارقىلى ەكسپورت ەتىلگەن اۆتوكولىكتەردى شەتەلدە جوندەۋگە بولاتىن بولدى.
قازاقستان مەن قىتاي مەتاللۋرگيادا اۋقىمدى جوبانى ىسكە قوسۋدا - «حالىق گازەتى»
قازاقستان رەسپۋبليكاسىنىڭ سىرتقى ىستەر مينيسترلىگىندە قازاقستاندا ءتۇستى مەتالداردى ءوندىرۋ جانە تەرەڭ وڭدەۋ سالاسىنداعى ينۆەستيسيالىق جوبانى ىسكە اسىرۋ جونىندەگى كەلىسىمگە قول قويىلدى، دەپ حابارلايدى «حالىق گازەتى» باسىلىمى «DKnews.kz»-كە سىلتەمە جاساپ.
كەلتىرىلگەن دەرەكتەرگە سۇيەنسەك، قول قويۋ راسىمىنە قازاقستان رەسپۋبليكاسىنىڭ سىرتقى ىستەر ءمينيسترىنىڭ ورىنباسارى الىبەك قۋانتىروۆ، قازاقستان رەسپۋبليكاسىنىڭ ونەركاسىپ جانە قۇرىلىس مينيسترلىگىنىڭ ۆيتسە-ءمينيسترى ولجاس ساپاربەكوۆ جانە «east Hope Group» كومپانياسىنىڭ باس ديرەكتورى چانجيۋن مەن قاتىستى.
سونىمەن قاتار جوبا ەكى وڭىردە جاڭا وندىرىستىك قۋاتتاردى قۇرۋدى قاراستىرادى، بۇل مەتاللۋرگيا سالاسىندا وزىق تەحنولوگيالاردى ەنگىزۋگە جانە دايىن ءونىمدى حالىقارالىق نارىقتارعا، سونىڭ ىشىندە ەۋروپالىق وداق، ورتالىق ازيا جانە قىتايعا ەكسپورتتاۋدى كەڭەيتۋگە مۇمكىندىك بەرەدى. جوبا اياسىندا ەلەكتر قۋاتتارى ستانتسيالارىنىڭ قۇرىلىسى كوزدەلۋدە.
يراندىق تۇقىمنىڭ الەمگە تانىمال بولۋىنىڭ سەبەبى نەدە؟ - ParsToday
يراننىڭ 6- تۇقىم عىلىمى مەن تەحنولوگياسى كونفەرەنتسياسى كەرماندا ءوتتى.
يراننىڭ عىلىم، زەرتتەۋ جانە تەحنولوگيا ءمينيسترى 6- يراننىڭ تۇقىم عىلىمى جانە تەحنولوگياسى كونفەرەنتسياسىنا جولداۋىندا قورشاعان ورتانىڭ وزگەرىستەرىنە ءتوزىمدى موديفيكاتسيالانعان تۇقىمدار ءوندىرۋ نەگىزىندە ازىق-تۇلىك قاۋىپسىزدىگىن قامتاماسىز ەتۋ جانە سوڭعى ناتيجەلەر مەن زاماناۋي تەحنولوگيالار ارقىلى تۇقىم شارۋاشىلىعىنا ينۆەستيتسيا سالۋدى دامىتۋدى قۋاتتادى، دەپ جازدى ParsToday اقپارات اگەنتتىگى.
ParsToday اقپارات اگەنتتىگىنىڭ مالىمەتى بويىنشا، يراننىڭ عىلىم، زەرتتەۋلەر جانە تەحنولوگيا ءمينيسترى حۇسەين سيماي جولداۋىندا وسى تاقىرىپ بويىنشا پىكىر بىلدىرگەن. ونىڭ ايتۋىنشا، يراننىڭ زاماناۋي تۇقىم تەحنولوگيالارى، سونىڭ ىشىندە الدىڭعى قاتارلى گەنەتيكا مەن سەلەكسيا، بيوتەحنولوگيالار جانە تۇقىم شارۋاشىلىعىن اقىلدى باسقارۋ سالاسىنداعى عىلىمي جەتىستىكتەرى كليماتتىڭ وزگەرۋىنىڭ قيىندىقتارىن شەشۋ جانە اۋىلشارۋاشىلىق ونىمدىلىگىن ارتتىرۋ ءۇشىن بىرەگەي مۇمكىندىكتەر تۋعىزدى.
يراندىق باسىلىم قورشاعان ورتانىڭ وزگەرىستەرىنە ءتوزىمدى موديفيكاتسيالانعان تۇقىمدار ءوندىرۋى تۋرالى شاعىن ماقالادا «يراننىڭ تۇقىم وندىرۋدەگى قۇندى قۋاتتارى»، «يران 5 ەلگە تۇقىم ەكسپورتتايدى»، «يراننىڭ اۋىلشارۋاشىلىق قاۋىمداستىعىنا 950 جاڭا وسىمدىك جانە باۋ-باقشا تۇقىمىنىڭ سورتتارىن تانىستىرۋ»، «يراندا تۇقىم تاسيتىن تەحنوپوت ءونىمىن تانىستىرۋ» جانە «يراننىڭ وسىمدىك وسىرۋدەگى ءجۇز جىلدىق تاجىريبەسىن سۋدانعا بەرۋگە دايىندىعى» دەگەن سەكىلدى بىرنەشە تاقىرىپقا توقتالعان.
تۇركى الەمى جاس عالىمدار كونگرەسى باستالدى - TRT
وزبەكستاننىڭ استاناسى تاشكەنتتە ەكىنشى حالىقارالىق تۇركى الەمى جاس عالىمدار كونگرەسى باستالدى.
تر كوممۋنيكاتسيا باسقارماسى، تۇرىك ىنتىماقتاستىق جانە ۇيلەستىرۋ اگەنتتىگى، شەتەلدەگى تۇرىكتەر جانە اعايىن قاۋىمداستىقتار باسقارماسىنىڭ قولداۋىمەن جاس عالىمدار وداعى ەكىنشى رەت ۇيىمداستىرىپ جاتقان كونگرەسكە اراسىندا تۇركيا، وزبەكستان دا بار 20 دان استام ەلدىڭ ءارتۇرلى ۋنيۆەرسيتەتتەرىنىڭ عالىمدارى قاتىسۋدا.
بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
«TRT»-نىڭ دەرەگىنشە، تاشكەنت مەملەكەتتىك زاڭ ۋنيۆەرسيتەتى ۇيىمداستىرعان «ورتاق بولاشاقتىڭ قۇرىلىسى» تاقىرىبىنداعى شارادا جاس عالىمدار وداعىنىڭ پرەزيدەنتى يۋنۋس كودجابىيىك ءسوز سويلەدى.
كودجابىيىك عالىمدار اراسىنداعى ىنتىماقتاستىقتى ارتتىرۋدى ماقسات ەتكەن بۇل كونگرەستىڭ بۇرىن الەمنىڭ ماڭىزدى عىلىم ورتالىقتارىنىڭ ءبىرى بولعان وزبەكستاندا وتۋىنە قۋانىشتى بولعانىن اتاپ ءوتتى.
كىرشەحير احي ەۆرەن ۋنيۆەرسيتەتىنىڭ رەكتورى پروفەسسور مۇستافا قاسىم قاراحوجاگيل دە قۇرىلتايدىڭ وزبەكستاندا ءوتىپ جاتقانىنا ريزا ەكەنىن ايتىپ، قۇرىلتايدىڭ تۇركى الەمىنە پايداسىن تيگىزۋىنە تىلەكتەستىگىن ءبىلدىردى. كاراحوجاگيل ءوز سوزىندە ۋنيۆەرسيتەتىنىڭ قىزمەتى تۋرالى مالىمەت بەرىپ، كونگرەسس اياسىندا وزبەكستان ۋنيۆەرسيتەتتەرىمەن كەزدەسۋلەر وتكىزىپ، ىنتىماقتاستىقتى دامىتقىسى كەلەتىندەرىن ايتتى.
اۆتور
بەيسەن سۇلتان ۇلى
