قورعانىس سالاسىنىڭ بيۋجەتى بيىل نە ءۇشىن قۇپيا؟ مينيسترلىك وكىلى جاۋاپ بەردى
استانا. KAZINFORM – قورعانىس ءمينيسترىنىڭ ءبىرىنشى ورىنباسارى سۇلتان كامەلەدينوۆ مينيسترلىكتىڭ بيۋجەتى بيىل نە ءۇشىن قۇپيا ەكەنىنە قاتىستى جاۋاپ بەردى.
كۋلۋاردا جۋرناليستەر مينيستر ورىنباسارىنان بيۋجەت قۇپيالىعى تۋرالى سۇراق قويدى.
«مەملەكەتتىك قۇپيالار تۋرالى زاڭعا سايكەس، جاريا ەتىلمەيتىن بەلگىلى ءبىر مالىمەتتەر بار. سوندىقتان ولار سىزگە وسىلاي جاۋاپ بەرەدى»، - دەدى ول.
جۋرناليست بۇعان دەيىن قورعانىس مينيسترلىگىنىڭ بيۋجەتى بارلىعىنا قولجەتىمدى بولعانىن ايتتى، الايدا قازىر جاعداي وزگەرگەن.
«مەن سىزگە كوپشىلىككە جاريا ەتىلمەيتىن اقپارات بار دەپ تۇرمىن عوي»، - دەدى سۇلتان كامەلەدينوۆ.
جۋرناليست: «بۇل - ءسىزدىڭ ەمەس، قازاقستاندىقتاردىڭ اقشاسى عوي. نەگە ونى قۇپيا ۇستاپ وتىرسىز؟» دەدى.
«سىزگە ءۇشىنشى رەت جاۋاپ بەرىپ وتىرمىن. جاۋابىما قاناعاتتانباعان بولساڭىز، باسپا ءسوز قىزمەتىنە رەسمي ساۋال جولداڭىز»، - دەدى ول.
