قورعانىس سالاسى يسپانيادا وندىرىلگەن اسكەري ۇشاقپەن تولىقتى

استانا. KAZINFORM - اسكەري-اۋە كۇشتەرى ا-400م اسكەري-كولىكتىك ۇشاعىمەن تولىقتى. بۇل تۋرالى قورعانىس مينيسترلىگى حابارلادى.

الماتىدا قورعانىس ءمينيسترى، گەنەرال-پولكوۆنيك رۋسلان جاقسىلىقوۆ قارۋلى كۇشتەردىڭ اۆياتورلارى مەن ءىس-شارا قوناقتارىن وسى وقيعامەن قۇتتىقتادى.

سالتاناتتى ميتينگكە كەڭەس وداعىنىڭ باتىرى، حالىق قاھارمانى، وتستاۆكاداعى اۆياتسيا گەنەرال-مايورى توقتار اۋباكىروۆ، Airbus Military ەۋروپالىق كونسەرنىنىڭ وكىلى ەلەنا پاريا مارتين، ق ر قارۋلى كۇشتەرىنىڭ ارداگەرى زاپاستاعى پولكوۆنيك ۆلاديمير پلاتوشين، اسكەري-كولىكتىك ەسكادريليانىڭ جەكە قۇرامى، دەسانتتىق-شابۋىلداۋ اسكەرلەرىنىڭ اسكەري قىزمەتشىلەرى، ازاماتتىق اۆياتسيا اكادەمياسىنىڭ ستۋدەنتتەرى جانە «جاس سارباز» قوزعالىسىنىڭ تاربيەلەنۋشىلەرى قاتىستى.

ۇشاق ەكيپاجىنىڭ كومانديرى پودپولكوۆنيك اسىلبەك جۇمابايەۆ قورعانىس ءمينيسترى گەنەرال- پولكوۆنيك رۋسلان جاقسىلىقوۆقا يسپانيادان تۇراقتى ورنالاسۋ پۋنكتىنە امان-ەسەن كەلگەنى تۋرالى باياندادى.

قورعانىس ۆەدومستۆوسىنىڭ باسشىسى ءىس-شاراعا قاتىسۋشىلاردى ايتۋلى وقيعامەن قۇتتىقتادى.

- زاماناۋي، ۇتقىر، جوعارى تەحنولوگيالىق ارميا قاشاندا ەلدىڭ قاۋىپسىزدىگىن قامتاماسىز ەتۋ مەن قورعانىس قابىلەتىن نىعايتۋدىڭ كەپىلى بولىپ قالا بەرەدى. بۇگىن مەملەكەتتىك قورعانىس تاپسىرىسى اياسىندا ءبىز جەكە قۇرامدى، اۋىر جۇكتەردى، تەحنيكانى تاسىمالداۋعا، گۋمانيتارلىق وپەراتسيالار شەڭبەرىندەگى تاپسىرمالاردى ورىنداۋعا ارنالعان اسكەري-كولىكتىك ۇشاق الدىق، - دەدى گەنەرال-پولكوۆنيك ر. جاقسىلىقوۆ.

سونداي-اق، مينيستر Airbus Military كومپانياسىنىڭ وكىلدەرىنە يسپانيانىڭ سيەۆيليا قالاسىنداعى اۆياتسيالىق دايارلىق ورتالىعىندا قازاقستاندىق مامانداردى وقىتۋعا بەلسەندى قاتىسقانى ءۇشىن العىسىن ءبىلدىردى.

- ۇشۋ جانە ينجەنەرلىك-تەحنيكالىق قۇرام بەلگىلەنگەن مەرزىمدە اۆياتەحنيكانى باسقارۋ مەن قىزمەت كورسەتۋگە قاجەتتى تەوريالىق قايتا دايارلاۋدان ءوتتى. كونسەرن وكىلدەرى بىزگە وسىعان قاتىستى قاجەتتى تەحنولوگيالىق اقپارات بەردى. بولاشاقتا ءبىزدىڭ ماماندار وعان ءوز بەتىنشە قىزمەت كورسەتىپ، ءتيىستى رەگلامەنتتىك ءىس-شارالاردى جۇرگىزە الادى، - دەپ تولىقتىردى ول.

ايتا كەتسەك، Airbus Military اۆياجاساۋ كونسەرنىمەن ەكىجاقتى ىنتىماقتاستىق بۇگىندە ەلىمىزدىڭ اسكەري-اۋە كۇشتەرىندە ءساتتى پايدالانىلىپ جۇرگەن س-295 ۇشاقتارىن ساتىپ العان 2013-جىلى جولعا قويىلعان بولاتىن.

سونداي-اق، اۋە كەمەسىنىڭ تەحنيكالىق سيپاتتامالارىن دا اتاپ وتكەن ءجون. ا-400م اسكەري- كولىكتىك ۇشاعى 37000 كەلى جۇكتى تاسىمالداۋعا قابىلەتتى. ماكسيمالدى جىلدامدىعى ساعاتىنا 802 كيلومەتر. ال ۇشۋ بيىكتىگى - 12200 مەتر، پراكتيكالىق قاشىقتىعى - 7870 كيلومەتر.