قورعانىس مينيسترلىگىنىڭ ۇكىمەت مۇشەلەرى مەن دەپۋتاتتارعا ارنالعان كۋرسى اياقتالدى

مەملەكەت باسشىسى - قازاقستان رەسپۋبليكاسى قارۋلى كۇشتەرى جوعارعى باس قولباسشىسىنىڭ تاپسىرماسىنا سايكەس، قورعانىس مينيسترلىگىندە اسكەري قاۋىپسىزدىك پەن قورعانىستىڭ وزەكتى ماسەلەلەرىنە ارنالعان ساباقتار ءوتتى.

وعان مينيسترلىك باسشىلارى مەن پارلامەنت پالاتالارى بەيىندى كوميتەتتەرىنىڭ دەپۋتاتتارى قاتىستى، دەپ حابارلايدى Kazinform.

ساباقتا ۇلتتىق قاۋىپسىزدىك، قورعانىستى جوسپارلاۋ جانە ەكونوميكالىق قامتاماسىز ەتۋ نەگىزدەرى، جۇمىلدىرۋ، ەل اۋماعىن جەدەل جابدىقتاۋ، اقپاراتتىق قاۋىپسىزدىك، اۋماقتىق جانە ازاماتتىق قورعانىس ماسەلەلەرى قارالدى.

- حالىقارالىق قاتىناستار مودەلىن جانە قازىرگى زامانعى قارۋلى قاقتىعىستاردىڭ جاي-كۇيىن ەسكەرە وتىرىپ، مەملەكەتتىڭ قاۋىپ-قاتەردىڭ ءوسۋى جاعدايىندا جانە سوعىس ۋاقىتىندا جۇمىس ىستەۋگە دايىندىعىن قامتاماسىز ەتۋ ەرەكشە ماڭىزعا يە. ءاربىر باسشى ۇلتتىق قاۋىپسىزدىك جۇيەسىندەگى ءوز ۆەدومستۆوسىنىڭ ءرولى مەن ورنىن نىق ءبىلۋى ءتيىس، - دەدى قورعانىس ءمينيسترى گەنەرال-پولكوۆنيك رۋسلان جاقسىلىقوۆ.

كۋرس داعدارىس جاعدايلارىندا، قاۋىپ-قاتەردىڭ ءوسۋى كەزىندە، سوعىس جاعدايىن ەنگىزۋدە جانە جۇمىلدىرۋدى جاريالاۋدا مەملەكەتتىك ورگانداردىڭ ماقساتتارى مەن مىندەتتەرىن ايقىنداپ بەردى.

وقۋ كۋرستارى مينيسترلەر مەن دەپۋتاتتارعا ساباقتا قاراستىرىلعان تاقىرىپتاردىڭ ماڭىزدى اسپەكتىلەرىن تالقىلاۋعا مۇمكىندىك بەرەتىن ىسكەرلىك، سىندارلى جاعدايدا ءوتتى. اسكەري قاۋىپسىزدىك جانە قورعانىس ماسەلەلەرى بويىنشا ءبىلىمدى ارتتىرۋ پراكتيكاسى جالعاستىرىلاتىن بولادى. كەلەسى جىلى وبلىس اكىمدەرى وسىنداي دايىندىقتان وتپەك.

كۋرس سوڭىندا قورعانىس ءمينيسترى مينيسترلەر مەن دەپۋتاتتارعا ءتيىستى سەرتيفيكاتتاردى تابىس ەتتى.