قورعانىس ءمينيسترى پرەزيدەنتكە بيىلعى اتقارىلعان ىستەر جونىندە ەسەپ بەردى

استانا. KAZINFORM - مەملەكەت باسشىسى قورعانىس ءمينيسترى رۋسلان جاقسىلىقوۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

رۋسلان جاقسىلىقوۆ قورعانىس ۆەدومستۆوسىنىڭ بيىلعى اتقارعان قىزمەتى تۋرالى ەسەپ بەردى.

قورعانىس ءمينيسترى:

بولىمشەلەردىڭ جاۋىنگەرلىك دايىندىعى مەن قارۋلى كۇشتەر قاتارىنا كۇزگى شاقىرۋ ناۋقانىنىڭ ناتيجەلەرى، سونداي-اق اسكەري قىزمەتتەگى ءتارتىپ پەن قاۋىپسىزدىكتى نىعايتۋعا، اسكەري قىزمەتشىلەردىڭ الەۋمەتتىك مارتەبەسى مەن جالاقىسىن ارتتىرۋعا باعىتتالعان شارالار جونىندە باياندادى؛

ارميانىڭ جاۋىنگەرلىك الەۋەتىن كەزەڭ-كەزەڭىمەن كوتەرۋ جانە اسكەردى دايارلاۋدىڭ جاڭا تاسىلدەرىنە كوشۋ ماسەلەلەرىنە ايرىقشا نازار اۋدارىلعانىن ايتتى؛

مەملەكەتتىك قورعانىس تاپسىرىسىنىڭ ورىندالۋ بارىسىن جەتكىزىپ، اسكەردىڭ قارۋ-جاراق پەن تەحنيكانىڭ جاڭا ۇلگىلەرىمەن، اتاپ ايتقاندا، ۇشقىشسىز باسقارىلاتىن اۆياتسيالىق جۇيەلەرىمەن، راديوەلەكتروندىق كۇرەس كەشەندەرىمەن جاراقتاندىرىلىپ جاتقانىن حاباردار ەتتى.

قاسىم-جومارت توقايەۆ ەلىمىزدىڭ بىتىمگەرلىك كونتينگەنتىنىڭ بۇۇ اياسىندا گولان جوتالارىندا اتقارىپ جاتقان قىزمەتى ماڭىزدى ەكەنىن اتاپ ءوتتى.

كەزدەسۋ سوڭىندا پرەزيدەنت - قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى قاسىم-جومارت توقايەۆ مينيسترگە وتاندىق قورعانىس كاسىپورىندارىمەن ءوزارا ىقپالداستىقتى جانداندىرۋ، اۋماقتىق قورعانىس پەن ارنايى وپەراتسيا كۇشتەرىن دامىتۋ، الەۋمەتتىك- قۇقىقتىق جۇمىستى كۇشەيتۋ جونىندە ناقتى مىندەتتەر جۇكتەدى.

وسىعان دەيىن قازاقستان مەن وزبەكستاننىڭ اسكەري قىزمەتشىلەرى بىرلەسىپ، «فوريش» تاۋلى پوليگونىندا «Hanjar-2024» تاكتيكالىق ارنايى وقۋ-جاتتىعۋىن وتكىزگەنىن جازدىق.

اۆتور
ايدار وسپاناليەۆ