قورعانىس ءمينيسترى رەسمي ساپارمەن بىرىككەن اراب امىرلىكتەرىندە بولدى
استانا. KAZINFORM - بىرىككەن اراب امىرلىكتەرىنىڭ استاناسى ءابۋ-دابيدە قورعانىس ۆەدومستۆوسىنىڭ باسشىسى گەنەرال-پولكوۆنيك رۋسلان جاقسىلىقوۆ باستاعان قازاقستاننىڭ اسكەري دەلەگاتسياسى كەلىسسوزدەر جۇرگىزىپ، قورعانىس-ونەركاسىپ كەشەندەرى كاسىپورىندارىنىڭ ونىمدەرىمەن تانىستى.
ساپار اياسىندا ءباا ۆيتسە- پرەزيدەنتى مانسۋر يبن زايد ءال ناحايانمەن حاتتامالىق كەزدەسۋ ءوتتى. وندا قورعانىس سالاسىنداعى ەكىجاقتى ءوزارا ءىس-قيمىلدىڭ پەرسپەكتيۆالارى تالقىلاندى.
سونىمەن قاتار ارميا ۇيىندە گەنەرال-پولكوۆنيك رۋسلان جاقسىلىقوۆ پەن قورعانىس ىستەرى جونىندەگى مەملەكەتتىك مينيستر مۇحاممەد بەن مۇباراك فادەل ءال-مازرۋي ءوزارا مۇددەلى ىنتىماقتاستىق باعىتتارىن تالقىلادى.
ب ا ءا قورعانىس-ونەركاسىپ كەشەنى كاسىپورىندارىنىڭ قىزمەتىمەن تانىسۋ ماقساتىندا قازاقستاندىق دەلەگاتسيا Tawazun Industrial park يندۋستريالىق پاركىندە بولدى. وندا اسكەري ماقساتتاعى ونىمدەر شىعاراتىن «نيمر»، «كاراكال»، «حالكون» جانە «اداسي» كومپانيالارى جۇمىس ىستەيدى.
اسكەري قىزمەتشىلەر اسكەري تەحنيكا مەن قارۋ-جاراقتىڭ تاكتيكالىق-تەحنيكالىق سيپاتتامالارىن زەردەلەدى. ولاردىڭ قاتارىنا جاۋىنگەرلىك ساۋىتتى ماشينالار، اتىس قارۋى، جوعارى دالدىكتەگى باسقارىلاتىن جانە تۇزەتىلەتىن اۆياتسيالىق بومبا، تىكۇشاق ءتيپتى ۇشقىشسىز ۇشۋ اپپاراتتارى جانە جوعارى قاشىقتىقتاعى توسقاۋىلداۋشى وق-دارىلەر كىرەدى.
بۇل قازاقستان تاريحىنداعى قورعانىس ءمينيسترىنىڭ بىرىككەن اراب امىرلىكتەرىنە العاشقى رەسمي ساپارى ەكەنىن ايتا كەتۋ كەرەك.
ايتا كەتەيىك، قورعانىس ءمينيسترى بۇدان بىلاي سپورتتىق جانە جاۋىنگەرلىك سامبو فەدەراتسياسىن باسقارادى.
