قور بيرجالارىندا Air Astana باعالى قاعازدارى ساۋدالانا باستادى
استانا. KAZINFORM - لوندون قور بيرجاسىندا (LSE) ج د ق- مەن، Astana International Exchange (AIX) بيرجاسىندا ج د ق جانە اكسيالارمەن، سونداي-اق قازاقستان قور بيرجاسىندا (KASE) اكسيالارمەن شارتسىز ساۋدا-ساتتىق باستالدى.
ساۋدا-ساتتىقتىڭ اشىلۋ سالتاناتىنا اۋەكومپانيالار توبىنىڭ پرەزيدەنتى پيتەر فوستەر، «سامۇرىق-قازىنا» ا ق باسقارما ءتوراعاسى نۇرلان جاقىپوۆ، بيرجالاردىڭ باسشىلارى، سونداي-اق بيزنەس جانە ينۆەستيتسيالىق قوعامداستىق وكىلدەرى قاتىستى.
«بۇل Air Astana تاريحىنداعى ماڭىزدى وقيعا، ويتكەنى ءبىز رەسمي تۇردە جاريا كومپانياعا اينالدىق. جيىرما ەكى جىل بۇرىنعى العاشقى رەيسىمىزدەن بەرى ءبىز ۇزاق جولدان وتتىك، جانە مەن جاڭا اكتسيونەرلەرىمىزدى قۋانا قارسى الامىن. ءبىز ورتالىق ازياداعى ەڭ ءىرى اۋەكومپانياسى بولۋ جانە ايماقتاعى ميلليونداعان ازاماتتارعا اسپان اشۋ ءۇشىن ءوسۋ تاريحىمىزدىڭ كەلەسى كەزەڭىنە اياق باسىپ جاتىرمىز»، - دەپ اتاپ ءوتتى پيتەر فوستەر.
جاريا مارتەبەگە يە بولۋ Air Astana دامۋىنداعى ماڭىزدى كەزەڭنىڭ باستالۋىن بىلدىرەدى جانە توپتىڭ جەرگىلىكتى جانە حالىقارالىق دەڭگەيدە ءوسۋى مەن دامۋى ءۇشىن جاڭا مۇمكىندىكتەر اشادى.
