قوقىس شىعارۋ اقىسىن تولەمەگەندەردىڭ ەلەكتر قۋاتى سوندىرىلەدى
قوقىس شىعاراتىن كومپانيانىڭ الدىندا بەرەشەگى بار وزبەكستاندىقتارعا ەندى ەلەكتر ەنەرگياسى ءۇشىن تولەم جاساۋعا جانە جىلجىمايتىن مۇلىك پەن كولىككە قاتىستى كەلىسىمدەردى راسىمدەۋگە شەكتەۋ قويىلماق.
مۇنداي تالاپ 2024-جىلعى 4- قاڭتارداعى «قالدىقتارمەن جۇمىس ىستەۋدى جەتىلدىرۋ جانە ولاردىڭ ەكولوگيالىق جاعدايعا تەرىس اسەرىن ازايتۋ شارالارى تۋرالى» پرەزيدەنت جارلىعىمەن بەكىتىلدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
قۇجاتقا سايكەس، اتالعان ەرەجە كەزەڭ-كەزەڭىمەن كۇشىنە ەنەدى. ياعني، جاڭا ءتارتىپ 2024-جىلدىڭ 1- ماۋسىمىنان باستاپ تاشكەنت قالاسىندا جانە وبلىس ورتالىقتارىندا قولدانىلادى. وندا قوقىس شىعاراتىن كومپانيانىڭ الدىندا 6 ايلىق بەرەشەگى بار ازاماتتارعا جوعارىدا اتالعان شەكتەۋلەر قويىلادى.
ال 1- قاراشادان باستاپ رەسپۋبليكانىڭ بۇكىل اۋماعىندا قالدىقتاردى كادەگە جاراتۋ قىزمەتتەرى ءۇشىن 3 اي قارىز بولعان تۇرعىندارعا ەلەكتر ەنەرگياسىنا تولەم جاساۋعا شەكتەۋ ەنگىزىلەدى.
2025-جىلدىڭ 1- قاڭتارىنان وزبەكستاننىڭ بارلىق اۋماعىندا قوقىس شىعارعانى ءۇشىن بەرەشەك مەرزىمى 1 ايدان اسقاندار جارىقسىز قالۋى مۇمكىن.
«قاراپايىم تىلمەن ايتقاندا، قوقىستى شىعارعانى ءۇشىن تولەمەيتىن ادام قاراڭعىدا وتىرادى»، - دەپ ءتۇسىندىردى وزبەكستان ەنەرگەتيكا مينيسترلىگىنىڭ باسپا ءسوز حاتشىسى حاسان توشحۋجايەۆ.
سونداي-اق جارلىقتا جازىلعانداي، 1- ساۋىردەن باستاپ قوقىستى شىعارۋ اقىسىن تولەمەگەن وزبەكستاندىقتار جىلجىمايتىن مۇلىك پەن اۆتوكولىككە قاتىستى مامىلەلەردى نوتاريالدى راسىمدەي المايدى. اتاپ ايتقاندا، نوتاريۋستار ءبىرىڭعاي ەلەكتروندىق جۇيە ارقىلى ونلاين رەجيمدە ازاماتتىڭ قارىزى بار نەمەسە جوق ەكەنىن تەكسەرەدى.
