قونايەۆتا تۇنگى ۋاقىتتا اسكەري بولىمنەن قاشىپ كەتكەن ساربازدار جازالاندى
قونايەۆ. KAZINFORM - قونايەۆ قالاسىنىڭ مامانداندىرىلعان اكىمشىلىك قۇقىق بۇزۋشىلىقتار جونىندەگى اۋدانارالىق سوتىندا ءتارتىپ بۇزعان ەكى ساربازعا بايلانىستى اكىمشىلىك ءىسى قارالدى.
- وسى جىلدىڭ 8-شىلدەسىندە ن. جانە م. كۇن ءتارتىبى بويىنشا بەكىتىلگەن جوسپاردى بۇزباۋ جايلى اعا سەرجانتتىڭ اۋىزشا بۇيرىعىن قاساقانا ورىنداماي جانە سول كۇنى كەشكە شامامەن ساعات 20:00-دە اسكەري بولىمشەنىڭ اۋماعىنان قوسالقى ەسىك ارقىلى ەسكەرتۋسىز شىعىپ، الاتاۋ قالاسىنا قاشىپ كەتكەنى انىقتالدى. سوت قاۋلىسىمەن ن. جانە م. ق ر ا ق ب ت ك-نىڭ 652-بابى 6-بولىگى بويىنشا اكىمشىلىك قۇقىق بۇزۋشىلىق جاساعانى ءۇشىن كىنالى دەپ تانىلىپ، 7 تاۋلىككە اكىمشىلىك قاماۋعا الىندى، - دەپ حابارلايدى وبلىستىق سوتتان.
سونداي-اق اسكەري بولىمدە وسىنداي قۇقىق بۇزۋشىلىقتاردىڭ الدىن الۋ جانە ولاردا قۇقىقتىق مادەنيەتتى قالىپتاستىرۋ ماقساتىندا سوت اكتىسىن جاريا ەتۋىنە ن. جانە م. -نىڭ قىزمەتتەستەرى شاقىرىلعانى حابارلاندى.
ەسكە سالايىق، الماتى وبلىسىندا 19 بالا تاربيەلەنگەن زاڭسىز مەدرەسە انىقتالعان بولاتىن.
اۆتور
دوسبول اتاجان
