قونايەۆتا جاڭا جىلدىق بەزەندىرۋگە بايلانىستى اۋديت جۇرگىزىلەدى
قونايەۆ. KAZINFORM - قونايەۆ تۇرعىندارىنىڭ نارازىلىعىنان كەيىن جاڭا جىلدىق بەزەندىرۋگە جۇمسالعان قاراجات تەكسەرىلەدى.
الەۋمەتتىك جەلىدە قونايەۆ قالاسىن جاڭا جىلعا وراي بەزەندىرۋگە 148,5 ميلليون تەڭگە بولىنگەنى تۋرالى اقپارات تارادى. سونداي-اق قويىلعان نىسانداردىڭ تەحنيكالىق قۇجاتتاماعا سايكەس ەمەس ەكەنى تۋرالى جازىلعان.
وسىعان بايلانىستى قونايەۆ قالاسىنىڭ اكىمدىگى مەردىگەر كومپانيا تاۋەلسىز اۋديتتەرگە جۇگىنگەنىن مالىمدەدى.
اۋديتتىڭ ناتيجەسىنە سايكەس، كەمشىلىكتەر انىقتالسا، اكىمدىك تاراپىنان مەردىگەرگە قاتىستى ءتيىستى شارالار قابىلدانادى.
- قالالىق ت ۇ ك ش جانە ت ءۇ ي ءبولىمىنىڭ مەملەكەتتىك تاپسىرىسىن ورىنداۋعا پورتال ارقىلى «جاسىل قالا قونايەۆ» ش ج ق م ك ك تاڭدالعان. اتالعان مەكەمە ورتالىق الاڭعا شىرشا، د. قونايەۆ ەسكەرتكىشى ماڭىنا 2025 مەرەكەلىك جازۋىن، ءتۇرلى ويىنشىقتار ورنالاستىرىپ، 5-جاعاجاي اۋماعىن بەزەندىرىپ، پارك، كوپىر، قالاعا كىرەبەرىستەگى ستەلا مەن اللەيالاردى جارىقتاندىرعان، مەرەكەلىك ويىنشىقتار قويعان. مەملەكەتتىك تاپسىرىستى بەرۋ كەزىندە تەك جاڭا جىلدا عانا ەمەس، جىل سوڭىنا دەيىن نىسانداردىڭ جارىقتاندىرىلىپ، كورىكتى بولۋى ەسەپكە الىنعان، - دەپ اتاپ ءوتتى قونايەۆ اكىمدىگىنەن .
ال 5-جاعاجاي تۋريستىك تارتىمدىلىقتى ارتتىرۋ ماقساتىندا بەزەندىرىلدى. شاعىن ساۋلەتتىك نىساندار «جاسىل قالا قونايەۆ» ش ج ق م ك ك بالانسىندا قالىپ، كەلەر جىلى دا پايداعا اسادى. جىل سوڭىندا قالانى بەزەندىرۋگە مەملەكەتتىك تاپسىرىس تەك قوسىمشا ارلەۋ رەتىندە جاسالادى.
