قونايەۆتا الەۋمەتتىك كومەككە 1 ميلليارد تەڭگەدەن استام قارجى جۇمسالادى
قونايەۆ. KAZINFORM - قونايەۆ قالاسى اكىمدىگىنىڭ ەكونوميكا جانە قارجى ءبولىمى 2025-جىلدىڭ جوسپارىمەن ءبولىستى.

رەسمي مالىمەتكە سايكەس، بيىل حالىقتى الەۋمەتتىك قامسىزداندىرۋ سالاسىنا 1 ميلليارد 87 ميلليون تەڭگە كوزدەلىپ وتىر. ونىڭ ىشىندە ا ا ك تولەۋ، تۇرعىن ءۇي كومەگى، مۇقتاج جانداردى گيگيەنالىق جابدىقتارمەن قامتۋ، جاردەماقىلار، ءبىرجولعى الەۋمەتتىك كومەك، مۇگەدەكتىگى بار ادامدارعا ۇيدە الەۋمەتتىك كومەك كورسەتۋ، ازاماتتاردىڭ جەكەلەگەن ساناتتارىن قوعامدىق كولىكتە جەڭىلدىكپەن، تەگىن جول ءجۇرۋ تۇرىندە الەۋمەتتىك قولداۋ سياقتى باعىتتار قاراستىرىلعان. سونداي-اق الەۋمەتتىك وسال توپتاعى ازاماتتار ءۇشىن پاتەرلەر ساتىپ الىنادى.
ودان بولەك قالا اكىمدىگى ينفراقۇرىلىمدى دامىتۋ بويىنشا جۇمىستار جالعاساتىنىن حابارلادى.
- 10-شاعىن اۋداندا ۋچاسكەلىك پوليتسيا پۋنكتىن سالۋعا، قاڭعىباس يتتەر مەن مىسىقتاردى ۋاقىتشا ۇستاۋ پۋنكتىن سالۋعا جوبالىق-سمەتالىق قۇجاتتاما ازىرلەنەدى. قالا كوشەلەرىنە 35 دانا ايالداما ورناتىلىپ، اعىمداعى جوندەۋ جاسالادى. سونىمەن قاتار جولاۋشىلار تاسىمالداۋ شىعىندارىن سۋبسيديالاۋعا 335 ميلليون 624 مىڭ تەڭگە ءبولىندى، - دەپ حابارلادى قونايەۆ اكىمدىگى.
سونداي-اق قالا باسشىلىعىنىڭ مالىمەتىنشە، بيىل 60 پاتەرلىك 9 تۇرعىن ءۇي مەن 50 پاتەرلىك تۇرعىن ءۇيدىڭ جوبالىق-سمەتالىق قۇجاتتارىن ازىرلەۋ اياقتالادى.
جىل جوسپارىنا سايكەس قالا بيىل 55 جىلدىق مەرەيتويىن اتاپ وتىلەدى. سونىمەن قاتار «قونايەۆ اۋەندەرى» ءانسامبلىن قۇرۋ جوسپارلانعان. دەنە شىنىقتىرۋ جانە سپورت ورتالىعىنىڭ قىزمەتىن قامتاماسىز ەتۋگە 23 ميلليون 468 مىڭ تەڭگە بولىنگەن.
ەسكە سالايىق، بۇعان دەيىن قونايەۆتا العاشقى مۇز ايدىنى اشىلعانىن جازعانبىز.