قونايەۆتا ادامدار كوبىنە قانداي قىلمىسقا بارادى

қылмыс
فوتو: Polisia.kz

قونايەۆ. KAZINFORM - قونايەۆتا ادامدار كوبىنە قوعامدىق ءتارتىپتى بۇزۋ، ويىن-ساۋىق پەن تاماقتانۋ ورىندارىندا الكوگولدى ءىشۋ سەكىلدى قۇقىقبۇزۋشىلىقتار جاسايدى. بۇل تۋرالى قونايەۆ قالاسى پروكۋرورىنىڭ ورىنباسارى مەرعالىم سماعۇلوۆ ايتتى.

«ساۋدا ورىندارىندا تىيىم سالىنعان تۇنگى ۋاقىتتا جانە كامەلەتكە تولماعان ادامداردىڭ الكوگولدى ساتىپ الۋ فاكتىلەرى دە بار، بۇل قۇقىق بۇزۋشىلىقتارعا جاعداي جاسايدى. ماس كۇيىندە ادام اقىل-ويى مەن سانالى مىنەز- قۇلىق قابىلەتىن جوعالتادى. وكىنىشكە قاراي، وتكەن جىلى قالا اۋماعىندا قاساقانا كىسى ءولتىرۋ بويىنشا ءۇش قايعىلى وقيعا تىركەلدى. تالداۋ كورسەتكەندەي، بارلىق قىلمىس تۇندە، جانجال كەزىندە جانە الكوگولدى تۇتىنۋ كەزىندە بولعان»، - دەدى مەرعالىم سماعۇلوۆ.

اتالعان قايعىلى جاعدايلاردىڭ الدىن الۋ ءۇشىن قالا پروكۋراتۋراسى مەن جەرگىلىكتى پوليتسيا قىزمەتى بىرلەسىپ، تۇنگى ۋاقىتتا جانە كامەلەتكە تولماعاندارعا الكوگول ساتۋدىڭ جولىن كەسۋ بويىنشا جۇيەلى پروفيلاكتيكالىق ءىس-شارالار مەن ءتۇسىندىرۋ ناۋقانىن وتكىزىپ جاتىر.

«سونداي-اق، قونايەۆ قالاسىنىڭ پروكۋراتۋراسى قالانىڭ ويىن-ساۋىق ورىندارىندا قوعامدىق ءتارتىپتى بۇزۋدىڭ الدىن الۋ، سونداي-اق، قوعامدىق تاماقتانۋ مەن ساۋدا ورىندارىندا الكوگول ونىمدەرىن وتكىزۋ ءتارتىبىن ساقتاۋ ءۇشىن كاسىپكەرلىك سۋبەكتىلەرىمەن جۇيەلى تۇردە ءتۇسىندىرۋ جۇمىستارىن جۇرگىزەدى. وسىعان بايلانىستى، پروكۋراتۋرا بارلىق ازاماتتى زاڭدى ساقتاۋعا جانە قالامىزداعى قاۋىپسىزدىك پەن ءتارتىپتى ساقتاۋعا جاردەمدەسۋگە شاقىرادى»، - قالا پروكۋرورىنىڭ ورىنباسارى مەرعالىم سماعۇلوۆ.

سوڭعى جاڭالىقتار