قوناق ۇيدە ادام توناعان كۇدىكتىلەر ۇستالدى

اتىراۋ. KAZINFORM - اتىراۋدا قوناق ءۇي كليەنتىنىڭ باعالى التىن جۇزىگى مەن 1,2 ميلليون تەڭگەسىن توناعان 2 كۇدىكتى ۇستالدى. تاعى ءبىر كۇدىكتى ەكى ادامنىڭ موبيلدى تەلەفوندارىن جىمقىرعان.

اتىراۋ وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، ءتارتىپ ساقشىلارى 2 توناۋ قىلمىسىنا قاتىستى كۇدىكتىلەردى ۇستاعان.

«ۇيىمداسقان قىلمىسقا قارسى ءىس-قيمىل باسقارماسىنىڭ قىزمەتكەرلەرى 2 توناۋ قىلمىسىنا بايلانىستى جەدەل ىزدەستىرۋ ءىس-شاراسىنا وتكىزدى. قىلمىستىڭ ءبىرى اتىراۋداعى قوناقۇيدە بولعان. قوناق ۇيدە 23 جانە 18 جاستاعى كۇدىكتىلەر 39 جاستاعى تۇتىنۋشىعا كۇش قولدانعان. ءسويتىپ، جابىرلەنۋشىنىڭ باعالى التىن جۇزىگى مەن قولساعاتىن، 1 ميلليون 200 مىڭ تەڭگە اقشاسىن توناعانى انىقتالدى. كۇدىكتىلەر انىقتالىپ ۇستالدى»، - دەپ حابارلادى دەپارتامەنتتىڭ باسپا ءسوز قىزمەتى.

سونداي-اق، اتالعان باسقارمانىڭ قىزمەتكەرلەرى 45 جانە 42 جاستاعى تۇرعىنداردىڭ ءموبليدى تەلەفونىن جىمقىرعان كۇدىكتىنى ۇستادى. كۇدىكتىنىڭ جاسى - 36-دا.

قازىر كۇدىكتىلەرگە قاتىستى توناۋ دەرەگىمەن تەرگەۋ امالدارى جۇرگىزىلىپ جاتىر. ق ر قىلمىستىق كودەكستە توناۋ قىلمىسى ءۇشىن كۇدىكتىلەرگە 3 جىلدان 7 جىل مەرزىمگە باس بوستاندىعىنان ايىرۋ جازاسى كوزدەلگەن.

ەسكە سالا كەتەلىك، بۇعان دەيىن اتىراۋدا بىرنەشە تۇرعىننىڭ اتىنا 7 ميلليون تەڭگە نەسيە راسىمدەگەن كۇدىكتى ۇستالعان ەدى.

اۆتور
جولداسبەك شوپەعۇل