قولدان جاڭبىر جاۋدىرعان قازاق

استانا. قازاقپارات - ابۋ دابيدە تۇراتىن قازاق جىگىتى الەمدە تەڭدەسى جوق قوندىرعى ويلاپ تاپقانىن ايتتى، دەپ حابارلايدى astana-akshamy.kz.

جەلىدە ارال وڭىرىنە «قولدان جاڭبىر جاۋعىزدى» دەگەن التاي اينابەك ەسىمدى ازامات تانىمال بولا باستادى. ءوزىن «قازاقتىڭ توني ستاركى» دەپ اتاعان جىگىت قازاقستانعا الەمدە تەڭدەسى جوق تىڭ تەحنولوگيا اكەلدىم دەيدى.

KAZ. NUR. KZ تىلشىسىنە بەرگەن سۇحباتىندا التاي اينابەك جاڭالىعىن اشىپ ايتىپ بەردى. سونداي-اق ينجەنەردىڭ «جاساندى جاڭبىرى» جونىندە سۋ رەسۋرستارى جانە يرريگاتسيا مينيسترلىگى وكىلدەرى پىكىر ءبىلدىردى.

التاي اينابەك - بىرىككەن اراب امىرلىكتەرىنىڭ استاناسى ابۋ دابيدە ورنالاسقان كليماتتى وزگەرتۋ تەحنولوگيالارى حالىقارالىق ورتالىعىنىڭ (International Center of Climate Change Technologies) باسشىسى.

ينجەنەر ءوزىن «جاساندى جاڭبىر جاۋعىزۋ» تەحنولوگياسىنىڭ اۆتورىمىن دەپ تانىستىردى. مامان پورتال تىلشىسىنە جاڭبىردى قالاي شاقىراتىنىن، تەحنولوگياسى قالاي جۇمىس ىستەيتىنىن ءتۇسىندىردى.

«انتيسيكلون - بۇل جوعارى قىسىم مەن اشىق اسپان. انتيتسيكلوندى «بۇزۋ» ءۇشىن جانە سيكلوندىق پروتسەستەردى ىسكە قوسۋ ءۇشىن (اتموسفەرالىق قىسىمدى ءتۇسىرۋ) اتوموسفەراعا ءبىرىڭعاي يوندار جىبەرىلەدى، بۇل عىلىمدا جەردەن كوتەرىلەتىن اۋا اعىنىن تۋدىرادى، تابيعي پروتسەسستەردىڭ يميتاتسياسى جاسالادى. اتموسفەرالىق قىسىم تومەندەگەن جەرگە مۇحيت اكۆاتورياسىنداعى اتموسفەرادان ىلعال كەلە بەرەدى»، - دەيدى التاي اينابەك. ⁠

ايتۋىنشا، جاڭبىر شاقىراتىن قوندىرعىسىنىڭ الەمدە تەڭدەسى جوق جانە ول پاتەنتتەلگەن.

«ە ا پ و-نىڭ (ەۋرازيالىق پاتەنت ۇيىمى - رەد. ەسكەرتپەسى) پاتەنتى بار، حالىقارالىق دەڭگەيدە زياتكەرلىك مەنشىگى قورعالعان. الەمدە بۇل سالاداعى اۆستراليا، گەرمانيا، شۆەتساريا، ب ا ءا سياقتى ەلدەردەگى ارىپتەستەرىمىزدىڭ تەحنولوگيالىق مۇمكىندىگىن جاقسى بىلەمىز. اريدتىك ايماقتاردا، شىن سۋ كەرەك ءشول مەن شولەيتتەردە ەشقايسىسى ناتيجە كورسەتە المايدى، سول ءۇشىن ولاردى باسەكەلەس دەپ ەسەپتەمەيمىن»، - دەيدى التاي اينابەك.

جەلىدە التاي اينابەكتىڭ «جاساندى جاڭبىر» جاۋعىزىپ جۇرگەنىنە سەنەتىندەر دە سەنبەيتىندەر دە تابىلادى. بۇل «حايپ» نەمەسە «بىرەۋدىڭ جوباسى» دەگەندەر دە بار بولىپ شىقتى.

«ول تۋرالى ەستىدىم. ءبىز قازاقستاندا مۇنداي جوبانى ءۇشىنشى رەت قولعا الىپ وتىرمىز. الدىڭعى ەكەۋىن كەي كۇشتەر ەشكىمگە ايتپاي جاۋىپ تاستادى، سول ءۇشىن بۇل جولى بارلىعىن لايف فورماتتا وتكىزىپ جاتىرمىز. «جوبا» بولاتىنداي مەن ساياساتقا ارالاسپايمىن، ءبىز الەمدىك ماسشتابتى كوزدەپ وتىرمىز. قازىر بۇل جوبانى ورتالىق ازيا مەملەكەتتەرىنە، قىتاي، رەسەي، ا ق ش، ەۋروپانىڭ الپاۋىت ەلدەرى، تاياۋ شىعىس ەلدەرى باقىلاپ وتىر. وسىدان تۇسىنسە بولادى، بىزگە ساياسات قىزىق ەمەس، جوبانى جۇزەگە اسىرۋ، سۋ قاۋىپسىزدىگى ماسەلەسىن شەشۋ قىزىق»، - دەيدى تەحنولوگيا اۆتورى.

التاي اينابەك ەلدەگى سۋ تاپشىلىعى، قۇرعاقشىلىق ماسەلەسىن تولىق شەشەتىنىنە سەنەدى، تەك ازىرگە بيلىك وكىلدەرىنەن قولداۋ كورمەگەنىن جەتكىزدى.

«ازىرگە ماردىمدى قولداۋ جوق. قاعاز جۇزىندە بارلىعى كەرەك دەپ وتىر. بۇيىرسا قولداۋ تابادى دەگەنگە سەنىمىم مول، ويتكەنى بۇل سۋ قاۋىپسىزدىگىن قامتاماسىز ەتەتىن جالعىز جول، جانە COP سياقتى (ب ۇ ۇ-نىڭ كليماتتىڭ وزگەرۋى جونىندەگى نەگىزدەمەلىك كونۆەنسياسىندا شەشىم شىعاراتىن نەگىزگى ورگان - رەد. ەسكەرتپەسى) الەمدىك ارەنادا اۋىز تولتىرىپ ايتاتىن كەيس»، - دەيدى التاي اينابەك.

ال سۋ رەسۋرستارى جانە يرريگاتسيا مينيسترلىگى وكىلدەرىنىڭ ايتۋىنشا، ازىرگە التاي اينابەك رەسمي تۇردە ۆەدومستۆوعا حات جازىپ، قولداۋ سۇراماعان. «قولداۋ تۋرالى رەسمي سۇراۋ سالعان جوق»، - دەدى مينيسترلىك وكىلى.

«استانا اقشامى» گازەتى