قولدان جاڭبىر جاۋعىزعان ادام ەرەكشە تەحنولوگيامەن ارالدى تولتىرىپ جاتىر
استانا. kazinform - ارالعا «قولدان جاڭبىر جاۋعىزعان» كليماتتىق تەحنولوگيالار مامانى، ينجەنەر، ونەرتاپقىش التاي اينابەك كەيىنگى جاڭالىقتارىن ءبولىستى، - دەپ حابارلايدى ماسساگەت.
التاي اينابەك ارالعا سۋ قۇيۋ وپەراتسياسى ءساتتى ءوتىپ جاتقانىن مالىمدەدى. ءتىپتى ارالدىڭ تاريحي تابانىندا قازىردىڭ وزىندە تاريحي جاۋىن رەكوردى تىركەلىپ، ءبىر جىلدىق جاۋىن-شاشىن نورماسى جاۋعان.
«ول دەگەنىڭ - 68000 شارشى شاقىرىم تەڭىزدىڭ ۇستىنە شىلدەگە قاراماي، قۋاڭشىلىق بولجانعانىنا قاراماي، كەمى 100 ميلليمەتر سۋ جاۋىن تۇرىندە ءتۇستى دەگەن ءسوز. سوندا ول - شامامەن 6-7 تەكشە شاقىرىم سۋ. ال جۇمىستار باستالار الدىن مەن پاراقشامداعى ءبىر ۆيدەومدا ەسكەرتكەندەي، پەريفەريادا دا جاۋىن بولادى، ويتكەنى جاۋىندى ارال تەڭىزىنىڭ ۇستىنە لوكاليزاتسيالاۋ ەتاپىنا وتكەن جوقپىز. ول كەزدە ناتيجەلەر بۇيىرسا ءتىپتى كەرەمەت بولايىن دەپ تۇر. ءبىزدىڭ جاعدايدا پەريفەريا دەگەن ارالعا سۋ بەرەتىن سىرداريا مەن امۋداريا وزەندەرى جانە باسقا ايماقتار. جەر استى سۋ دەڭگەيى دە ارتىپ جاتىر. كورشى ەلدەر بۇرىنعىداي ارالعا سۋدى قىسىپ بەرۋگە مۇمكىندىگى دە بولماي وتىر. ياعني، امالسىز سۋدى ارالعا «سبروس» جاساپ جاتىر، ارالعا قايتارىپ جاتىر، بارلىعىنا سۋ جەتىپ ارتىلىپ جاتىر»، - دەپ جازدى ول جەلىدە.
ەرەكشە تەحنولوگيا اۆتورىنىڭ ايتۋىنشا، سۋ سالاسىنا جاۋاپتى مينيستر قىزىلوردا وبلىسىنا ساپارىندا سولتۇستىك ارالعا قۇيىلاتىن سۋ كولەمى 12,5 ەسە ارتقانىن مالىمدەدى.
«ول ءالى دە از كورسەتكىش. بۇيىرسا سۋ ودان دا كوپ كەلەدى، ويتكەنى سوڭعى جاۋىنداردىڭ سۋلارى ءالى ارالعا جەتىپ ۇلگەرگەن جوق. وسى پوستپەن سىزدەرگە بىرنارسەنى ايتقىم كەلەدى، جوبانىڭ باستالۋ ۋاقىتىن ءبىز بەلگىلەگەن جوقپىز. سۋشار مينيستىرلىگى (سۋ رەسۋرستارى جانە يرريگاتسيا مينيسترلىگى - ەسك. ) بولجام بويىنشا جاۋىن از بولاتىن كەزەڭدى تاڭدادى جانە دە ءبىرىنشى ەتاپتىڭ اياقتالۋ ۋاقىتىن دا اتالمىش مينيسترلىك شەشەدى. ءبىزدىڭ ويىمىز بەن ارەكەتىمىزدىڭ بارلىعى بۇلت جانە جاڭبىرمەن ارالعا سۋ قۇيۋ عانا»، - دەدى جوبا اۆتورى.
ەسكە سالايىق، بۇعان دەيىن جاساندى جاڭبىر تەحنولوگياسىنىڭ كومەگىمەن نەبارى ءبىر اپتادا ارال باسسەينىنە شامامەن 50 ميلليارد تەكشە مەتر سۋ جينالعانى حابارلاندى.
