قول مەن اياق نەگە توڭادى؟ - دارىگەر جاسىرىن سەبەپتەرىن اتادى
استانا.قازاقپارات - قول مەن اياقتىڭ اركەز توڭۋى ادامنىڭ جاي عانا سۋىقتاعانىن بىلدىرمەيدى. كەيدە بۇل اعزانىڭ تومەن تەمپەراتۋراعا تابيعي رەاكتسياسى بولۋى مۇمكىن.
الايدا كەيبىر جاعدايلاردا اياق-قولدىڭ ۇنەمى سۋىق بولۋى قان اينالىمىنىڭ بۇزىلۋىن نەمەسە بەلگىلى ءبىر اۋرۋلاردىڭ بارىن كورسەتۋى مۇمكىن، دەپ حابارلايدى turkystan.kz.
پيروگوۆ ۋنيۆەرسيتەتىنىڭ ساراپشىسى ماكسيم ياروۆويدىڭ ايتۋىنشا، قول مەن اياق دەنەنىڭ نەگىزگى بولىگىنە قاراعاندا الشاق ورنالاسقان. سوندىقتان بەلگىلى ءبىر جاعدايلاردا بۇل مۇشەلەردەگى قان اينالىمى بۇزىلۋى مۇمكىن.
- نەلىكتەن ءدال قول مەن اياق توڭادى؟
- ادام اياق-قولىنىڭ سالقىنداۋىن ءارتۇرلى جاعدايلاردا سەزىنۋى مۇمكىن. قول مەن اياق دەنەنىڭ نەگىزگى بولىگىنەن الشاق ورنالاسقان مۇشەلەر بولعاندىقتان، بەلگىلى ءبىر جاعدايلاردا ولاردىڭ قان اينالىمى بۇزىلۋى ىقتيمال.
- قاي كەزدە بۇل قاۋىپتى ەمەس؟
- اياق-قولدىڭ سالقىنداۋىنىڭ سەبەپتەرىن ەكى توپقا بولۋگە بولادى. ەڭ ءجيى كەزدەسەتىن جانە زيانسىز سەبەپتەردىڭ ءبىرى - سىرتقى فاكتورلاردىڭ اسەرى. مىسالى، ادامنىڭ سالقىن بولمەدە نەمەسە دالادا ۇزاق ۋاقىت بولۋى.
بۇل جاعدايدا اياق-قولدىڭ سالقىنداۋى شەتكەرى قان تامىرلارىنىڭ تۇيىلۋىنە بايلانىستى بولادى. ونىڭ ماقساتى - قاننىڭ نەگىزگى بولىگىن ماڭىزدى ىشكى اعزالاردىڭ اينالاسىنا شوعىرلاندىرىپ، ولاردى «توڭىپ قالۋدان قورعاۋ».
مۇنداي جاعدايدا ادام جىلى جەرگە كىرگەننەن كەيىن اياق-قولى قايتادان جىلىنادى. الايدا سۋىقتا ۇزاق ۋاقىت بولۋ، سونىڭ ىشىندە ەس- ءتۇسسىز كۇيدە قالۋ، تەك اياق- قولدا عانا ەمەس، بۇكىل اعزادا قايتىمسىز وزگەرىستەرگە اكەلىپ، ءتىپتى ولىمگە سوقتىرۋى مۇمكىن.
- بۇعان قانداي اۋرۋلار سەبەپ بولۋى مۇمكىن؟
- ەكىنشى توپقا بەلگىلى ءبىر اۋرۋلارعا بايلانىستى سەبەپتەر جاتادى. ولاردىڭ قاتارىندا ريەۆماتولوگيالىق اۋرۋلار بولۋى مۇمكىن. سونداي-اق رەينو فەنومەنى كەزدەسەدى. بۇل كەزدە ساۋساقتاردىڭ ۇساق قان تامىرلارىندا ترومبوز دامىپ، ساۋساقتاردىڭ ۇشىنداعى فالانگالار اعارىپ كەتەدى.
سونداي-اق جۇرەك اۋرۋلارى، سوزىلمالى جۇرەك جەتكىلىكسىزدىگى سەبەپ بولۋى مۇمكىن. اياقتاعى ۆاريكوزدى اۋرۋ كەزىندە دە اياق-قولدىڭ سالقىنداۋ سەزىمى پايدا بولادى. ءبىرىنشى جاعدايدا بۇل جۇرەكتىڭ قان ايداۋ قىزمەتىنىڭ تومەندەۋىنە، ال ەكىنشىسىندە ۆەنالاردىڭ كەڭەيۋىنە بايلانىستى.
قانت ديابەتى جانە ديسليپيدەميا كەزىندە قان تامىرلارىنىڭ تارىلۋى بايقالادى. بۇل دا اياق-قولعا قاننىڭ جەتكىلىكتى مولشەردە بارۋىن تومەندەتەدى.
- قاي كەزدە دارىگەرگە قارالۋ كەرەك؟
- وسىلايشا، اياق-قولدىڭ سالقىنداۋى ءارتۇرلى اۋرۋلاردىڭ ماڭىزدى بەلگىسى بولۋى مۇمكىن. سوندىقتان ەگەر اياق-قولدىڭ ۇزاق ۋاقىت بويى توڭۋى جىلى بولمەگە كىرگەننەن نەمەسە ىستىق شاي ىشكەننەن كەيىن دە باسىلماسا، دارىگەرگە قارالۋ قاجەت.
